Марий Элысе чодыраште пожар лийын кертме лӱдыкшӧ пагыт мучашлалтын.
Тидын нерген республикын Пӱртӱс поянлык, экологий да йырым-йырысе средам аралыме министерствыже увертарен. Тений тыгай пагыт 20 апрель гыч 19 октябрь марте шуйнен. Чылаже 14 пожар лийын да 14,32 гектарыште ужар поянлыкна локтылалтын: 12-шо чодыра фондын кумдыкыштыжо, кокытшо Российысе Обороно министерствын мландыштыже. Кажне пожарым икымше суткаштак йӧртен кертме.
Эн шуко гана тул Звенигово лесничествыште ылыжын. 12 пожарлан тӱҥалаш амалым еҥ-влак ыштеныт гын, кок ганаже кӱдырчан йӱр титакан лийын.
Чодыра пожар ынже лий манын, 22-27 май гутлаште еҥ-шамычлан чодыраш пураш чарыме лийын. Тул ылыжмым мланде, тыгак кӱшычынат эскереныт. Тидлан «Лесохранитель» видеоэскерымаш комплексым, вышке-влакым кучылтыныт, верлаште еҥ-шамыч шкештат шижтареныт. Пожарым йӧртымашке 58 техникым ушымо. Чодырам оролышо пашаеҥ, чыла службо-влакын сай пашаштлан кӧра кундемыштына кугу туткар лийын огыл.
Светлана Носован фотожо.
