Мер эскерымаш штаб Единый йӱклымӧ кечын пашажым иктешлен да эскерыше-влакын пашаштым шымлен.
Штаб вуйлатыше Евгений Кузнецовын палемдымыж почеш, 2026 ийысе сайлымаш кампаний регионысо мер тергымаш системылан ик эн кумда лийын.
‒ Эскерыше-влак республикысе чыла избирательный участкыште, а тиде 500 наре УИК, пашам ыштеныт. Ик нарушенийым Мер эскерымаш рӱдерын эскерышыже-влак ужыныт да чареныт. Увер сынан икмыняр йодмаш лийын. Чыла материалым вигак избиркомыш да правам аралыше органлашке колтымо, – палемден Евгений Кузнецов.
Штаб вуйлатышын алмаштышыже, Россий Общественный палатын еҥже Роман Золотухин тыге иктешлен ойлен:
‒ Кажне участкыште видеоэскерымаш да мер тергымаш лийын. Кунам ик мандатан округышто оппозицийыште улшо партийын кандидатше сеҥа, да тидын годым ДЭГ ден кагаз протокол-влак келшен толыт, йӱклымашым вашталташ тыршыме нерген ойлыманат огыл, воштылмашым веле луктеш. Общественный палате палемда: кампаний чын эртен да почылтшо, конкурентный лийын.
Партийный списке дене Кугыжаныш Думыш моло партий-влак дене таҥастарымаште кугу ойыртем дене «Единый Россий» партий эртен. Ик мандатан округышто КПРФ деч кандидат Сергей Казанков сеҥен.
‒ Тыгай сӱрет ончыкта: нимогай темдымаш лийын огыл, адакшым цифровой технологий-влакын ӱшанле улмыштым пеҥгыдемда, – палемден штаб вуйлатыше.
Евгений Кузнецов «Диалог о фейках: 4.0» тӱнямбал форумышто лиймыже да тушто мо нерген мутланыме нерген каласкален. Ойлымыж почеш, 18 гыч 21 сентябрь марте сайлымашын цифровой инфраструктурышкыжо 4000 утла толкын DDoS-атакым фиксироватленыт. Туге гынат ик еҥын йӱкшат йомын огыл. Сайлымаш кузе эртымым 130 эл гыч 1200 утла тӱнямбал наблюдатель эскерен.
Штабын пашажым Марий Элын Общественный палатыжын председательже Герман Дементьев иктешлен. Тудо палемден:
‒ Сайлымаш эртымек, избирательный таҥасымашын участникше-шамычынат, обществынат сайлымаш итог дене келшымышт регионысо сайлымаш комиссийын пашам сайын шуктымыжым да независимый эскерымаш системын пайдале улмыжым ончыктен.
Любовь Камалетдинова
М.Скобелевын фотожо
