31 март гыч 4 апрель марте Санкт-Петербургышто эртаралтше хор коллектив-влакын тӱнямбалсе чемпионатыштышт Марий республикнан чапшым Национальный президент искусство школ пеленысе йоча хор (художественный вуйлатышыже, дирижёр – Лилия Семёнова, хормейстерже – Александра Чузаева, концертмейстерже – Лариса Юшкова) арален да икымше степенян лауреат лӱм дене палемдалтын.
Чемпионатыште Российын чыла гаяк регионжо, тыгак Белурусь, Казахстан гыч хор коллектив-влак лийыныт. Нуно кум этап дене мастарлыкым ончыктеныт, кажныштыже жюри баллым шынден.
Усталык шӱлышан таҥасымаште Гран-прим Санкт-Петербург гыч рвезе-влакын «Петербургский камерТОН» хорышт сеҥен налын.
Жюри участник, вуйлатыше да дирижёр-влакымат посна номинацийлаште ойырен. Марий хорын вуйлатышыже Лилия Семёнова Москосо педагог-влак дене пырля «За педагогическое мастерство» номинацийыште палемдалтын.
А.БАЙКОВА.
