Марий Эл - 100

Кочкыш гыч – «аршаш»!

Марий Эллан 100 ий темме пайрем эртен каен гынат, южо вере алят тудлан пӧлеклалтше мероприятий-влак эртаралтыт.

Мутлан, республикыште почылтшо икымше исправительный рӱдерыште тиде датым ойыртемалтшын палемденыт.

Тудо Медведево посёлкышто 3-шо №-ан исправительный колоний воктене верланен. Учрежденийлан улыжат — кок ий наре. Тушто кызыт 56 еҥ наказанийым шукта. Нунылан суд виеш (принудительно) пашам ыштыкташ пунчалым луктын. Тыште улшо-влак пашам ыштымыштлан тӱрлӧ кугытан пашадарым налыт. Иктыштлан эн изи пашадар кугыт палемдалтеш гын, южыштын тылзылан эсогыл 55 тӱжем теҥге мартеат погына. Тышеч, судын пунчалже дене келшышын, 5 гыч 20 % марте кугыт оксашт кугыжаныш парышыш колталтеш.

Производствышто тыршыме деч вара улшо яра жапыштым нуно тӱрлӧ семын эртарат. Ончыч театрлашкат, концертлашкат, тоштерлашкат тӱшка дене коштыктеныт гын, ынде коронавирус чер шарлыме лӱдыкшылан кӧра кызытеш тидын нерген мондашышт логалеш.

Туге гынат судитлыме-влак, мутлан, Марий Эллан 100 ий темме пайрем лӱмеш пырдыж газетым луктыныт да кидпаша конкурсыш ушненыт. Тушто «Йошкин пырыс» деч посна эше ик эн ойыртемалтшыже чапланыше марий кочкыш брендла гыч чумырымо аршаш лийын. Тудым шыл, сыр кочкышла ден кинде сату гыч ямдыленыт. Тыгай икебанам але марте, товатат, иктат ужын огыл, палемда республикысе УФСИН-ын пресс-службыжо.

Мо оҥайже, конкурс деч вара тиде «аршаш» арам лийын огыл. Чыла кочкыш денат осужденный-шамыч сийлалтыныт.

Л.КАМАЛЕТДИНОВА

Опубликовать в Одноклассники

Добавить комментарий