Кодшо шуматкечын Йошкар-Олаште Покро кечылан пӧлеклалтше ялозанлык ярмиҥга эртыш.
Ынде икмыняр ий почела республикнан рӱдоласе Чарла кремльыштыже ялозанлык ярмиҥга эртаралтеш. Тушко ондак кундемнан чыла гаяк луклаж гыч перерабатыватлыше предприятий, райпо, тӱшка ден фермер, тыгак шке озанлыкым кучышо-влак сатуштым ужалаш конденыт. А ярмиҥга Ленин площадьыште эртен гын, тунам, чынжымак, ужалышыжат, налшыжат лыҥак погыненыт ыле. Ынде ярмиҥга шке куатшым кунар-гынат йомдарен толеш, тушко сатум кондышыжат, тудым налаш шонышыжат утыр шагалемыт. Покро ярмиҥгамат тыгайланак шотлаш лиеш. Тыште амалжат уло, очыни. Коронавируслан кӧра еҥ-влак тӱшкан погынымо деч шекланат, адакшым ончычсо район-влакын кечышт ынде ок эртаралт, кумылым нӧлтышӧ концерт программат уке.
Покро ярмиҥга кечын утларакше мӱйым да мӱкшын пуымо моло продукцийым, чылаже латкоктын, темленыт. Тыгак Оршанке гыч тамле йӧрым, колбаса сатум конденыт ыле, кидмастар-шамыч шке сатуштым ужаленыт, пакчасаска ден пареҥгым темлыше-шамыч лийыныт.
В.СМОЛЕНЦЕВ
