Татарстан Республикысе Агрыз район Кӧлегеш ялыште марий юмыйӱла дене туныктымо семинар ден кумалтышым эртареныт. Тушко 30 наре еҥ чумырген. Эсогыл пошкудо Удмуртий гычат чумыргеныт. Мутлан, Удмурт Республикыште илыше марий-влакын НКА-штым вуйлатыше А.Радыгин, Удмуртийын Тӱҥ онаеҥже С.Губернаторов, Балтаси районысо марий-влакын НКА-штын председательже В.Максютов, молат лийыныт.
Кумалтышыш еш денат миеныт. Мутлан, Валентин Ишмурзинын ешыже. Отыш толшо-шамыч коклаште вес калык гыч лекше-влакат лийыныт. Елизавета Маликова татар йолташ ӱдыржым пырля конден. Тудын марий юмыйӱла дене лишкырак палыме лияш кумылжо шукертак лийын.
– «Тиде гана кумалтыш жапыште семинар эртен. Садлан теорий шинчымашым практикыште ончыкташ кӱлын. Чылажымат эр эрдене, кече лекме годым тӱҥалынна. Тылеч ончыч тыгай сынанак кумалтышым кеҥежым эртаренна. Ӱшанена, кумалтышыш мийыше-влакын чоныштышт тысе шнуй шӱлыш, пӱртӱс вий келге кышам кодат, – каласен Татарстанысе марий-влакын НКА-штым вуйлатыше, Татарстан Республикын Тӱҥ онаеҥже Олег Третьяков.
Л.МИХАЙЛОВА
Авторын фотожо
Снимкыште: Кумалтышыш мийыше-влак
