Марий Эл вуйлатыше Александр Евстифеев Йошкар-Оласе ракетный дивизийын отдельный медицинский батальоныштыжо лийын. Ты учрежденийым калыкыште вес семынже военный госпиталь маныт.
Республик вуйлатышылан медперсоналын паша ойыртемже-влак нерген каласкаленыт. Тыге, мутлан, госпиталь пашаеҥ-влак медицине полышым кеч-могай условийыштат пуэн кертыт. Тидлан йӧным кӱлеш оборудований-влак улмо, медикамент ситыме, кӱкшӧ квалификациян медперсонал тыршыме ыштат.
— Мемнан специальный транспорт ден оборудованийна уло. Сандене эсогыл пасушто полышым пуэн кертына, — каласен 14-ше ракетный дивизийын отдельный медицинский батальонжын командирже Олег Сидоренко.
Регион вуйлатыше Александр Евстифеев медучреждений кумдыкым ончен савырнен, кочмыверыште, палатылаште да операционныйышто лийын.
Войсковой частьын командирже Виталий Тарасовын палдарымыж почеш, Йошкар-Оласе ракетный дивизийын военный госпитальже пелен отдельный медицинский батальон 2013 ий 1 сентябрьыште ышталтын. Тудын оралтыже 1964 ийыште чоҥалтын. Кӱлеш медицине технике сита гынат, госпитальын материальный базыжым уэмдыман, зданийым олмыктыман. Дивизий командир дене мутланыме годым моло шотышто полышым пуымо йодыш-влак нергенат ойленыт, палдара Марий Эл Республик вуйлатышын организаций да аналитике виктемже.
Л.Камалетдинова.
