Морко район Шеҥше селасе уремла дене кудал эртыме годым икмыняр пеледыш клумбо шинчалан перныш. Тыгай моторлыкым кӧ ыштен кертын манын шоналтышым да, тидым пален налаш манын, верысе администрацийыш пурен лектым. Ял шотан илем вуйлатыше Полина Сергеевна Иванова кундемым тӱзатымаште Матвеевмыт еш полша манын каласыш да нунылан кугу таум, тазалыкым, еш пиалым тыланыш.
Тыгай поро пашам ыштыше-шамыч дене лишкырак палыме лийме шуын, санденак суртыштым кычал кайышна. Пӧртышт деке миен шумеке, суртоза ден озавате лачак палисадникым тӧрлат ыле. Жапышт шагал лийын гынат, Клара Владимировна мемнан дене мутым вашталташ йӧным муо. А Анатолий Александрович шке сомылжым умбакыже шуйыш.
Матвеевмыт коктынат верысе школышто ятыр ий пашам ыштеныт. Ӱдырамаш тӱҥалтыш класслаште туныктен, пӧръеҥ физикым вӱден, школ директорын алмаштышыже, икмыняр ий директор лийын. Кызыт коктынат сулен налме канышыште улыт. Но сурт коклаштышт паша эре сита. Клара Владимировна пеледышым ончен кушташ йӧрата. Пӧрт ончылныжо моткочак сӧрал роза, моло пеледыш тӱзланат, а пакчаштыже могай гына кушкыл уке: шоптырвондо, шуанвондо, эҥыжвондо, олмапу, облепихе, пакчасаска нергенже ойлыманат огыл. Пареҥгыжымак икмыняр сортым шынденыт. Вольыкымат ончат.
Тылеч посна ӱдырамаш кундемжым тӱзатымаште тырша. Тышке пелашыжымат уша. Тиде пашам нуно шке кумылын ынде кумшо ий шуктат.
– Кугу Отечественный сарыште вуйым пыштыше ден тушто кредалше-влаклан шарныктыш воктенсе кумдыкым тӱзаташ йодмаш дене мемнан деке ял шотан илем вуйлатыше Полина Сергеевна Иванова лектын. Ме келшышна. Клумбо мотор, калыкын шинчажым куандарыше лийже манын, ятыр жап шонкалышна. Икмыняр жап гыч тудын могай лиймыжым вуйушыштем «сӱретлышым». Шке окса дене нӧшмым наледышым, мӧҥгӧ гыч икмыняр пеледышым конден шындышым, клумбым шке семынем келыштарен сӧрастарышым.
Вара Ленин памятник воктенсе кумдыкым пелашем дене тӱзатышна. Тушко тӱрлӧ пеледышым шындышна. Анатолий Александрович кеҥеж мучко тушто шудым сола. Ял шӱгарла воктенат мотор клумбым келыштаренна. Тыгак Анатолий Александрович пошкудылан тракторна дене мландым курал пуа, – каласыш Клара Владимировна.
Озавате дене мутланымына годым шӱлыкан улмыжым шижын шуктышым. Чонжым эмгаташ огыл манын, мо лиймыжым шекланенрак йодым.
– Мый пушкыдо кумылан улам, сандене чонем сусырташ куштылго. Очыни, тидланак кӧра илышыште шуко йӱштӧ-шокшым чыташ логалын. Тау мутымат шагал колалтын. Но мый ом ӧпкеле. Тӱҥжӧ калыклан поро пашам ышташ, вет сай паша сай денак пӧртылеш. Икшывем-влак шкеныштым илышыште муыныт, сайын тунемыныт, чонлан келшыше пашам ыштат, мыланна полшат. Поснак эргымлан тауштена. Тудо чынжымак «кугу букван» пӧръеҥ кушкын шогалын, эҥертышна лийын. Ӱдырем-шамыч, уныкам-влак куандарат, умбакыже илаш вийым ешарат. Тек Юмо нунылан тазалыкым, пиалым пуа! – мане К.Матвеева.
Клара Владимировнам лыпландараш манын, тупшым вӱчкалтышым да ешыжлан чыла сайым, кужу ӱмырым да, тыгаяк поро кумылан кодаш тыланен, тауштен, шке корнем дене ошкыльым.
Л.ШАБДАРОВА.
Ю.Исаковын фотожо.
