Кикбоксинг дене тўнямбал кубок верч таҥасымаште землячкына Полина Петухова шке тўшкаштыже, ўдырамаш-влак коклаште, чемпион лўмым сеҥен налын.
Турнир 14-17 июньышто Италийыште эртен. Тушто 42 эл гыч кок тўжем утла участник вийжым терген. Пелефиналыште Полина Словакий гыч тале спортсмен М.Хохликова дене вашлийын гын, финалыште Россий гыч К.Исмаилова дене таҥасен. Боец койышыж дене ойыртемалтын, Полина 3:0 счёт дене ончыко лектын да тўнямбал кубокым сеҥен налын. Тыге марий ўдыр кум гана тўнямбал кубокын чемпионжо лийын.
– Мый 52 килограмм нелытан-влак коклаште таҥасенам. Икымше бой опытан, Европын чемпионжо, тўнямбал кўкшытан турнирлаште ончыко лекше Моника Хохликова дене лийын. Тудым сеҥымылан шукышт єрыныт, – ойла ўдыр. – Финалыште тўнямбал кўкшытан спорт мастер, россиянке Кристина Исмаилова дене вашлийынам. Тудын дене ик гана Ялташте Российын чемпионатыштыже таҥасаш логалын. Иктым палемдыме шуэш: тиде таҥасымашлан пеш нелын ямдылалтме. Тупем сусыртенам, эсогыл ик жап тренировкымат ыштен кертын омыл. Адакшым тунемаш кўлын. Кумылат волен… Кеч тазалыкым эреак эскерем, но тушко кайыме деч кок кече ончыч черланенам. Арам огыл сеҥымаш дек корно куштылго огыл, маныт. Теве тыге улмаш. Тау тренерем-влаклан: Сергей Витальевич Шабердинлан да Чуваш кикбоксинг Ассоциацийын президентше Алексей Иванович Соловьёвлан.
Чаманен каласыман, награждений годым соперникем-влак пьедесталыш лектын огытыл.
Е.Эшкинина.
