Оршанке районышто 8 ияш ӱдырын врач-шамычын титакыштлан кӧра колымыж нерген газетыште возенна ыле.
Тиде йодыш деке уэш пӧртылаш амал лектын – Оршанке районысо эмлымверыште пашам ыштыше-влак шотышто вуйшиймашым Россий президент Владимир Путин дене вияш кылыш колтеныт. Тылеч вара тиде дела дене кылдалтше пашам Россий президент пеленсе Айдемын праваже да граждан обществым вияҥдыме шотышто советын председательже Михаил Федотов контрольыш налын.
Марий Элыш паша дене толмыж годым тудо ӱдырын ача-аваж дене вашлийын.
Советник дене пырля тушто Марий Элын прокуроржо да Россий Следствий комитетын Марий Элысе Следствий управленийжын вуйлатышыже лийыныт. Нуно ӱшандарен ойленыт: тиде факт шотышто делам контрольыш налме, следствий кӱлеш семын эртаралташ тӱҥалеш.
Тиде вашлиймаште лийше общественник-шамыч шылтыде каласеныт: Марий Элыште врач-шамычын титакыштлан кӧра еҥ-влак, тыгодымак йоча-шамыч колымо сӱрет шуэн огыл лиеда. Республикыште йоча паталогоанатомат уке. Тидлан верчынак 8 ияш ӱдырын колымо чын амалже але мартеат пале огыл. Активист-влак тыгак каласеныт: яллаште медицине полышым пуымо качестве кызыт моткоч ӱлыкшӧ.
Ала кеч тылеч вара республикыштына иктаж вашталтыш лиеш?
Л.Камалетдинова.
