Шуко пачашан пӧртын тошкалтыш кумдыкыштыжо тамакым шупшаш лиеш мо?
А.Кириллов.
Медведево поселко.
Йодышлан Медведево районысо прокурорын полышкалышыже В.В.Поляков вашештен:
— «Граждан-влакын тазалыкыштым йырым-йырысе тамак шикш деч да тамакым шупшымын кышаже деч аралыме нерген» Федеральный Закон дене келшышын, лифтлаште да шуко пачашан пӧртысӧ тӱшкан пайдаланыме пӧлемлаште тамакым шупшаш огеш лий. Тидлан административно мут кучаш шогалтен кертыт. Тыглай граждан-влаклан штраф кугыт 500 гыч ик тӱжемат пеле марте теҥгеш шуэш. Административный правам пудыртымаш нерген кодекс дене келшышын, протоколым полиций пашаеҥ-влак возышаш улыт. Сандене тыгай сӱрет тендам тургыжландара гын, илыме верыштыда полиций органыш йодмаш дене лектын кертыда.
С.Носова ямдылен.
