Тачысе лаштыкнан унаже – Морко район Зеленогорский посёлкын ӱдыржӧ Екатерина Филиппова. Тудо Йошкар-Оласе медицине колледжыште тунемеш. Сайын тунеммыжлан ӱмаште декабрьыште тудо республикын тазалыкым аралыме ончычсо министрже С.Г.Мочалов лӱмеш именной стипендий дене палемдалтын.
– Катя, тый ончыкылык врач улат. Тыйын шонымаште, сай специалист лияш мом ыштыман?
– Зеленогорский школышто 9-ше классыште тунеммем годым следователь лияш шоненам, но ковамын ош тӱня гыч кайымыж деч вара медикын корныжым ойырен налынам. Кызыт фельдшерлан кокымшо курсышто тунемам, умбакыжым кардиолог лийнем.
Тиде профессий моткоч кӱлешан, вет тудо айдемын ӱмыржым кужемдаш полша. Мыйын шонымаште, сай врач лияш кыртмен тунемман, кугу чытышан лийман. Тыгак лӱддымылыкат кӱлеш. Черле дене шыман, ласкан мутланыман.
– Пытартыш жапыште эмлышылан шуко кагаз дене шинчашыже лоаглеш. Тиде вет пашалан мешая?
– Ик могырым, тиде могай-гынат чаракым ышта, но вес могырым, черлын дневникшымат вӱдыман. Кажне пациентым шарнен кодаш ок лий, сандене документ дене пашам ыштымаш кугу полышым пуа. А тидын деч поснаже нигузе ок лий.
– А тый ешыштет иктаж-кӧм эмленат?
– Родо-тукымемлан могай эмым йӱмӧ, тиде але вес черым кузерак эмлыме шотышто каҥашым пуэм. Эмлымверыште практикым эртыме годым медшӱжар-шамычлан полшенам. Черле-влак ятыр гана таум ойленыт. Тыгай годым чонлан моткоч сайын чучын, пашам ышташ кумыл кӱзен.
– Кызыт самырык специалист ялыш шагал годым толеш. Тидлан ятыр амал уло. А тый селасе ФАП-ш пашам ышташ кает ыле?
– Ялыште самырык врач ятыр нелылык дене тӱкна. Паша опыт деч посна йоҥылышымат ышташ лиеш. Тидыже лӱдыкта, вет тылат каҥашым йодаш нигӧн деч, чылажымат шке гыч тунемман. Умылем, тидын гоч чылан эртат, но кызыт мый ялыш пашам ышташ каяш ямде омыл. Ӱшанем, жап эртыме семын шонымашем вашталтеш.
– Врач шкежат таза илыш-йӱлам кучышаш. А тый капкылет кузе шуарет?
– Школышто волейбол дене модынам, варажым кушташ тӱҥалынам. Зарядкым кажне кечын ышташ тыршем, куржталам, велосипед дене кудалыштам, ролик коньки дене коштам.
– Палем, тый сӱретлаш йӧратет…
– Сӱретлаш икымше классыште тунеммем годымак кумылаҥынам. Мылам Национальный президент школ-интернатышкат каяш темленыт, но ача-авам сӱретчын сомылжо кугу оксам огеш кондо маныныт, сандене вес профессийым ойыраш ойым пуэныт.
Кызыт яра годым гына сӱретлем, но тыгайже шагал лиеш. Молан манаш гын уло жапым тунеммаш налеш. Мый сай специалист лийнем, сандене чылажымат келгын шымлаш тыршем.
Лидия ШАБДАРОВА.
М.Скобелевын фотожо.
