Кодшо изарнян У Торъял районысо Чӱксола тӱвыра пӧртыштӧ тыгай лӱман усталык кас эртен. Тудо Марий Эл тӱвыран сулло пашаеҥже Зоя Демидован 65 ияш лӱмгечыжлан пӧлеклалтын.
Зоя Ивановнам пайремже дене «У Торъял муниципал район» муниципал образований вуйлатыше Евгений Небогатиков, верысе «Первый май» колхоз председатель Аркадий Новиков да молат саламленыт. Тыгак йолташыже, коллегыже да лишыл еҥже-влак мурпӧлекым ыштеныт – «Чевер май», «Вӱдйогын», Ший оҥгыр», шкенжын вуйлатыме «Ош куэ» ансамбль ден посна мурышо-влак пайрем оза ден погынышо калыкым куандареныт. А ик эн шерге пӧлекше Роман эргыж ден уныкаже-влакын муралтымышт лийын, очыни.
Тиде касыште юбиляр шкежат шочмо ялже, ешыж нерген возымо мурыжо-влакым йонгалтарен.
Ийгот погынымым ончыде, Зоя Ивановналан ончыкыжымат тыгаяк чолга да усталык шӱлышан лияш тыланен кодына.
Любовь Камалетдинова.
