29 мартыште Йошкар-Оласе 29-ше №-ан школышто педагог-влакын да нунын наставникыштын «Келшымаш мозаике» республикысе усталык фестивальышт эртен. Мероприятийыш школышто, ссузлаште, ешартыш образованийым пуышо организацийыште самырык туныктышо да ончыкылык педагог-влак чумыргеныт.
Фестивальыш мийыше кажне педагог Марий Элыште илыше ик калыкын тӱвыраже, йӱлаж дене палдарен. Тыгак калык кочкышымат тамлаш йӧн лийын. Тиде кечын чыла калыкын пырля ваш келшен илымышт поснак шижалтын.
Туныктышо-шамыч мастарлыкыштым мурымаште, куштымаште почын ончыктеныт. Икымше верым Марий Турек район гыч педагог-влакын командышт налын. Нуно удмурт калык дене палдареныт. Кокымшо верыш Йошкар-Ола гыч самырык туныктышо-шамыч лектыныт. Нуно чечен калыкын куштымашыж дене жюрин кумылжым савыреныт. Кумшо верым Шернур районын командыжлан пуэныт. Нуно армян калыкын шокшо чонан улмыштым ончыктеныт.
«Эн сай вокал» номинацийыште Звенигово районын командыже «Васильковое небо» белорус муро дене ойыртемалтын. «Эн сай куштымаш» номинацийыште Оршанкысе шуко профилян колледжын самырык туныктышыжо-влак сеҥышыш лектыныт. Нунын «Аджикская полька» узбек куштымашышт уло залым пырля тавалташ таратен. «Эн сай калык кочкыш» номинацийыште Килемар район гыч педагог-влак ончылно лийыныт. Грузин кочкышым тамлын ыштымышт жюрилан келшен. «Эн сай ролик» видеопрезентацийым (еврей калыкын тӱвыраж нерген) Курыкмарий район гыч команде ончыктен.
Л.Шабдарова
