Российысе самырык-влак коклаште эртаралтше кеҥеж Спартакиадын кокымшо этапше гыч дзюдоист Т.Деветьяров ден К.Кудрявцев ший ден бронзо медаль дене пӧртылыныт.
Таҥасымаш Кирово-Чепецкыште эртен. тушто Юл кундем федерал округ гыч (12 регион) 21 ияш марте 129 спортсмен вийжым терген. Марий Элын чапшым 10 еҥ арален.
Олимпийский резерв училищын кокымшо курсыштыжо тунемше Тимур 90 килограмм нелытан-влак коклаште кокымшо верыш, Козьмодемьянск гыч Константин 100 килограмм нелытан-шамыч коклаште кумшо верыш лектыныт.
Спартакиадын финалже 4-7 июльышто Пензыште лиеш.
Е.Эшкинина
