«ТурСтат» рейтинг агентстве 2017 ийлан турист отрасльыште ик эн сайын пашам ыштыше регион-влакым ойырен да спискым савыктен. Тиде радамыш Марий Элат логалын.
Эл мучко кодшо ийын чылаже 56,5 миллион турист коштын, тидыже ончычсо ий деч 3 процентлан утларак. Кодшо ийысе индеш тылзе жапыште Российыш йот элысе 19 миллион турист толын коштын. Марий Эл тиде рейтингыште 36-шо верыш лектын. Ӱмаште мемнан деке 600 тӱжем турист толын коштын. Таҥастарена: Чуваший 53-шо верыш лектын гын, тушко 280 тӱжем турист толын коштын.
Каласен кодыман, ты рейтингыш Москвам, Санкт-Петербургым пуртен огытыл, молан манаш гын мыланна турист шотышто нунын дене таҥасаш неле. Эн ончыл верыште Краснодар край, Моско область да Крым каят. Кодшо ийын Краснодар кундемысе курортлаште 15,8 миллион турист канен, Моско воктене — 14 миллион, Крымыште — 5,4 миллион.
Лу «эн сай турист» регион коклаште Приморье, Владимир ден Ярославль областьла, Татарстан, Вологод, Тюмень, Свердловск область-влак улыт. Ярославльыште, Приморьеште да Карачаево-Черкесийыште кундем кӧргысӧ туризмжак ик эн сайын вияҥеш.
С.Носова.
