Шукерте огыл «Хронология исторических событий горного края» книга ош тӱням ужын.
Тудым альбом-книгат манаш лиеш, молан манаш гын тушто шуко фотосӱрет, карт пуалтыныт. Нуным поян исторический материал, тыгак легенде дене пойдарыме. Книгам Курыкмарий районысо тӱвыра пӧлкам вуйлатыше Л.Кубеков ден методист Тамара Петрова ямдыленыт. Но историй, археологий дене кылдалтше материал-влакым лӱмлӧ марий шанчызе-влак чумыреныт. Тунемше, шанчызе, краевед-влакалан веле огыл, тыглай лудшо, ты кундемыш турист семын толшо-влакланат тушеч оҥай да пайдале уверым пален налаш лиеш. Тӱҥ шотышто Курыкмарий кундемын акрет курымла гыч тачысе кече марте вияҥме корныж дене палыме лийына. Икымше ужашыште хронологий пуалтын гын, вес ужашыштыже кундемысе историко-культурный верла дене палдарыме. А тыгай верже Юл эҥерын пурла велныже 140 наре погына. Тушто кажныж нерген палдарыше аншлаг-влакым вераҥдыме.
Чаманен каласыман, книган тиражше изи, 500 экземпляр гына. Но ончыкыжым районысо тӱвыра пӧлка пашаеҥ-влак, йӧным муын, тудым кугурак тираж дене савыкташ шонат.
С.Носова.
М.Скобелевын фотожо.
