Шочмо Кужэҥер район Кожласола (Марий Олма) ялышкем Кугу Лаждӱр гыч вашке корным ыштат.
Теҥгече интернетыште тиде уверым лудмекем, тунар чот куанышым!
Тиде куанле уверым мыняр ий вучымо?! Марий Олма калык корно деч посна мыняр ий йӧсланен?! Такшым кодшо курымын 80 ийлаштыже Кугу Лаждӱр гыч ял мучаш марте корным нӧлтышт. «Ну, вашке меат ынде мотор корно дене кошташ да кудалышташ тӱҥалына!» – шонен, тидлан калык йывыртен. Но нӧлтенже шуктышт, а асфальтым огыл, кеч тыгыде кӱм шарашыжат окса ыш сите, витне. Паша тидын денак мучашлалтын. Сандене телым поранан, луман игечыште школыш коштмо годым, вараже, Йошкар-Олашке тунемаш кайымеке, рӱдолана гыч Кугу Лаждӱрыш маршрутым почмеке, тушко автобусыш лекме але мӧҥгӧ кайыме годым утларакше аҥысыр изи-и гына йолгорно дене ошкылаш тӧчымӧ. Шошым да шыжымже лавырам мыняр нӧштылмӧ?! Мыняр йолчиемым локтылмо?! Кеҥежым йӱран игече годым эсогыл, мотор котим кудашын, чарайолын ошкылмо! Ой, Юмыжат, мом чытен лекме огыл?! А мемнан семын шочмо ял гыч вес вере илаш кайыше-влакын шочмо суртыш миен толде, чон чытен огыл, вет тушто ача, ава але вес лишыл еҥ, Лаждӱр корныш ончен, изин-кугун вучен шинченыт.
Корным ышташ тӱҥалшаш нерген увер тынар куандарен кертмым мемнан ял калык семынак кужу жап йӧсланен да вучен илыше-шамыч гына умылен кертыт! А кугыжаныш закупко сайтыште вераҥдыме уверже тыгай: Кугу Лаждӱр – Марий Олма кокласе корным чоҥаш сметым ямдылаш Кужэҥер районын бюджетше гыч 3,2 млн. теҥге ойыралтеш. Тений, 2021 ийыште, тудым ямдылен шуктышаш, а 2022 ийыште корным ышташ тӱҥалшаш улыт. Корнын кугурак ужашышкыже тыгыде кӱм шарат, а илемыштыже асфальт-бетонан лийшаш. Контрактым подписатлыме деч вара кӱлеш документым идалык деч шагалрак жапыште ыштен шуктышаш улыт, палемдалтеш сайтыште.
Тиде жапше вашкерак толын шужо, идалыкше писынрак эртен кайыже ыле! Тунам кеч ялыштына 52 сурт-оралте гыч 26 пӧртыштыжӧ илыше-влак ласка-ан шӱлалтат. А южынажым мӧҥгыштӧ вучышыжат шукертак уке гынат, садак кеч кугурак пайрем годым шочмо ялыш ынде сай корно дене миен толына ыле. Тӱҥжӧ – тӱҥалтыш уло!
Любовь Камалетдинова
