Российысе художник ушемын Марий Элысе пӧлкаже кажне ийын иктешлыме шотан «Марий кундем» выставкым эртара. Тушко сӱретче-влак эн сай пашаштым ончаш луктыт. Мутат уке, нунышт тӱрлӧ темым авалтыше, тӱрлӧ жанр дене сӱретлыме улыт.
Молгунамсе семын Марий калыкнан историйже нергенат икмыняр сӱрет ыле. Нунын кокла гыч иктыже – Россий сӱретче ушемын еҥже Иван Богомоловын «Полтыш ден Шошма» пашаже.
Радынан ончыл ужашыштыже – Шошма, воктеныже Полтыш пелашыже, а шеҥгелнырак – Токтауш.
— Шошма эн ончычак тушманым ужын да кидысе пучшо дене тушман толмым шижтарен. Имне ӱмбалне шинчыше Полтыш торашке онча, а тудын шеҥгелныже Токтауш шольыжо, кидышкыже кердым налын, тудым кӱшкӧ нӧлталмыж дене кредалаш ямде улмыжым ончыкта, – сӱретше нерген каласкала художник Иван Богомолов. – Тиде радына нерген шуко жап шонен коштынам, Полтыш курыкыштат ятыр гана лийынам. Сӱретыштем курык чоҥгаташте Виче кундемым аралыше сарзе-влакым ончыктенам. Тораште огыл, ӱлнӧ, изэҥер, шошым ташлен, а умбалнырак Шошма эҥер, Малмыж чыкма койыт.
Кугу сӱретым ямдылымыж годым И.Богомолов историй науко кандидат Сергей Константинович Свечниковын полышыжланат эҥертен.
Полтыш курык Киров кундем Малмыж олаште верланен. Тушко кажне ийын тӱрлӧ кундем гыч марий-влак Полтышлан вуйым саваш коштыт, сандене ты сӱрет ятыр еҥлан шерге.
А.БАЙКОВА
Авторын фотожо
