Марий Эллан 100 ий, Кужэҥер районлан 95 ий темме лӱмеш районышто «Мари ӱдыр – сылне ӱдыр» конкурс онлайн йӧн дене эртен.
Тушко куд ӱдыр ушнен. Нуно ийгот шот дене кок номинацийыште таҥасеныт: 10-13 ияш да 14-17 ияш-влак. Конкурсын условийже почеш ӱдыр-влак оргкомитетыш шке фотосӱретыштым, творческий видеопрезентацийыштым ончыч колтеныт. Вара кок кече жапыште Кужэҥер районысо централизоватлыме клуб системын ВКонтакте соцкыл лаштыктыштыже интернет-йӱклымаш эртен.
«Ончышо-влакын кумылыштым налше приз» номинацийыште Шорсола гыч (Рушплак тӱвыра пӧрт деч) Диана Завьялова эн шуко йӱкым поген. Оргкомитетын пунчалже почеш гран-прим Старсела тӱвыра пӧрт деч участнице Юлия Горохова сеҥен. Икымше степенян лауреат лӱм дене Кугу Лаждӱр тӱвыра пӧрт деч Мария Бердникова, кокымшо степенян дене Тошто Йӱледӱр гыч Анна Андреева, кумшо степенян дене Шӱдымарий гыч Дарина Тимофеева палемдалтыныт. А теве Йывансола тӱвыра пӧрт деч Дарина Поликарпова «Марий ӱдыр – тале ӱдыр» номинацийыште посна дипломым сеҥен налын. Тӱҥ шотышто жюри участнице-влакын мурен-куштымыштым, художественный мастарлыкыштым, моло деч ойыртемалт моштымыштым, видеопрезентацийын ийготлан келшен толмыжтым шотыш налыныт.
Снимкыште: Юлия Горохова
С.НОСОВА
