Кажне айдемын чон лукыштыжо могай-гынат шонымаш ила. Йошкар-Ола гыч вате-марий Зыковмытынат кок эн кугу шонымашышт лийын: «дом мечты» ден «сад мечты» манмым ышташ. Чотак шонет, чотак вучет да шкежат тыршет гын, шонымаш садак шукталтеш.
Нунын денат тыгак лийын. 2012 ийыште Медведево район Курыкнур ялыш илаш куснымекышт, ушыштышт ашныме сӱрет чыныш савырнен! Наталья Александровна ден Владимир Григорьевич эн ончычак налме тошто пӧртым пуженыт да шонымо пӧртыштым чоҥеныт. А жап эртыме семын шонымо садыштат ышталтын! Тыге улшо кумдыкышт гыч 20 утла сотык мландыште ынде — пӱтынек пеледыш!
— Тынар кумдыкым тидлан гына ойыраш чаманымыла чучын огыл? – йодым.
— Мӧҥгешла, ме ола воктене налаш пӧртым кычалмына годым лачшымак пеледышым шуко шындаш ситыше мланде кумдыкан сурт-оралтым кычалынна! – палемдыш ӱдырамаш.
Наталья Александровнан эн йӧратыме пеледышыже – лилий. Санденак пакчаштышт 200 утла тӱрлӧ сорт лилий, 100 утла тӱрлӧ лилейник, тынарак сорт тюльпан, 50 утла тӱрлӧ нарцисс, 30 утла сорт пион, 8 тӱрлӧ роза, а эше безвременник, чистец, корейысе чай (лышташыж дене чынже денак чайым шолташ лиеш!), лихнис, хоста, гейхера, энотера, хэлоне… улыт. Чылаже 100 утла тӱрлӧ пеледыш ден кушкыл пакчаштым сӧрастара! Но Наталья Александровна ден кок ӱдыржӧ тидын дене гына огыт серлаге! Кажне ийын эре мом-гынат уым ешарат! Мо оҥайже, ынде иктаж тӱжем утла сорт кушкыл ден пеледышыштат уло гынат, озавате кажныж нерген кунам шындыман, кузе ончен-куштыман, тидлан мом ыштыман – радамлын каласкален кертеш!
Адакшым тыште пеледыш-шамычым кушко логалын але кушто верым муыныт, тушко огыл, а икте-весыштын пырля кушкаш келшен толмыштым, кунам пеледмыштым, эсогыл тӱсыштым шотыш налын шынденыт. Санденак, мутлан, ик вере йошкар-ал, вес вере кандалге, кумшо вере нарынче… тӱсан пеледыш-влак тӱшка дене верланеныт.
А эше пакчаштышт алыча, барбарис, дыне, арбуз, виноград… кушкыт. Виноградым гын суртоза шкеже ончен кушта! Лач тыште икымше гана мый, мутлан, грецкий пӱкш пушеҥгым ужым! Арам огыл Наталья Зыковам Йошкар-Олаште «Пеледыш тӱня» выставкыш кажне ийын ӱжыт…
Суртозан, Владимир Григорьевичын, кид-йолжо чылалан толеш. Санденак тудын тыршымыж дене «сад мечты» манмыштым кызыт изи «кӱвар», каналтен шинчаш да лӱҥгалташ келыштарыме вер, чоҥалтше чапле беседке, эсогыл теплице сӧрастарат.
— Мемнан деке унала толшо але лӱмынак ончалаш пурен лекше еҥ-шамычын веле огыл, чыла тидым ужын, кумылышт нӧлталтеш, шкемынат, тыгай сӧраллыкым ончен, куанымем дене, паледа, кычкырымем шуэш! Чонем мура! – кумыл нӧлтынак палемдыш Наталья Александровна.
А еҥ-шамыч тиде садыш ончалаш веле огыл, эше лӱмынак фотографироватлалташат толыт улмаш! Теве мыят тыгай йӧн дене пайдаланыде ыжым чыте…
Мом ойлаш, тиде, чынжымак, шонымаш да кугешнымаш пакча!
Любовь КАМАЛЕТДИНОВА
