Вес районыш — унала

Коронавирус инфекций лӱдыкшылан кӧра тений У Торъялыште Анатолий Булыгиным шарныме лӱмеш гармоньчо-влакын фестиваль-конкурсышт лийын огыл.

Туге гынат ты мероприятийым палемдыде коден огытыл. Фестиваль-конкурсын ончычсо участникше-влак кокла гыч икмыняр еҥ чумыргеныт да кодшо кечылаште Оршанке районыш миеныт. Конкурсын ик эн чолга организаторжо Николай Сидоркин У Торъял районысо гармоньчо-влаклан ты гана шкешотан пайремым ышташ кумылаҥын: тудо нунылан Кучко селаште Румянцевмыт ешын почмо Гармонь пӧртыш миен толаш темлен.

Тоштер уна-шамычлан моткоч келшен.

Вашлиймаш оҥай концерт дене мучашлалтын. Тушто нуно тоштерыште экспонат семын ончыкташ лукмо гармонь-влак дене йӧратыме семыштым шоктеныт.

Умбакыже делегаций Тошто Крешын ялыш экскурсий дене миен. Тушто уна-шамычым Анатолий Булыгинын пырля тунемме йолташыже Роман Шамтиев ден чапланыше кидмастар, краевед Виталий Кудрявцев вашлийыныт. Нуно гармоньчо-влакым М.Шкетанын пӧрт-тоштерышкыже да Виталий Николаевичын тыршымыж дене почмо да вуйлатыме Мастарлык пӧртыш пуртен луктыныт. Пытартышлан кидмастарын тоштерымак ушештарыше шке мӧҥгыштыжат уна лийыныт.

Л.КАМАЛЕТДИНОВА