«Стопкоронавирус: статистика» сайтын 14 июльысо данныйже почеш, Марий Элыште пытартыш суткаште COVID-19 дене черланыме 28 у случайым рашемдыме, 10 еҥ паремын, 3 черле колен.
Марий Элын Тазалыкым аралыме министерствыжын 14 июль эрдене увертарымыж почеш, пытартыш суткаште республикнан инфекционный стационарлаж гыч 67 пациентым мӧҥгӧ колтымо, тыгодымак 80 черлым эмлалташ пыштыме. Тыге, таче эрдене стационарыште чылаже 667 еҥ киен. Ты чот гыч 215 пациентлан «COVID-19» диагнозым шындыме, 153 черле неле состоянийыште лийын, 7 еҥ шодым искусственно вентилироватлыме йӧн дене шӱлен, 261 пациентлан кислород кӱлын.
Республикыштына коронавирус дене кылдалтше чараклыме икмыняр мерым кораҥдыме, пляж-влакым почмо, кевыт ден уремысе кафе-шамычлан угыч пашам ышташ тӱҥалаш йӧным ыштыме… Но чыла тиде шучко чер деч аралалташ чарнаш амалым ок пу! COVID-19 чакнен огыл! Аралыза шкендам да лишыл еҥда-влакым!
М.ИВАНОВА
