1 июль гыч Марий Элысе медицине организаций-влак эркын дене угыч пашам ышташ тӱҥалыныт, да у коронавирус инфекций дене кылдалтше чараклыме мероприятий-шамычымат йыжыҥын-йыжыҥын кораҥдат.
Профилактический прививкын национальный календарьже да эпидемий показаний шотышто профилактический календарь (60 ий деч кугурак да инфекциян огыл хронический чер дене орланыше пациент-влак дене кылдалтын огыл) кышкарыште йоча ден кугыеҥ-шамычым угыч иммунизироватлаш тӱҥалме. Тыгодым пеҥгыде противоэпидемиологический режимым палемдыме, тудыжо эн ончычак медицине тӧнежлам южтарыме, кварцеватлыме, дезинфицироватлыме, пациент ден нуным ужатен кондыштарыше-шамычын шкем аралыше средстве дене пайдаланымышт, социальный дистанцийым эскерымышт дене кылдалтын.
Медицине организаций-влакын ончылгоч ямдылыме графикышт почеш куснылшо медицине комплекс дене верлашкат лекташ тӱҥалыт. Туштат противоэпидемический режимым шукташ кӱштымӧ – кажне пациент деч вара дезсредстве дене дезинфекцийым ышташ, калыклан шкем аралыме средстве дене пайдаланаш да икте-весе деч эн шагалже 1,5 м коклам кучаш.
Социальный вияҥмаш министерствын «Об утверждении перечней вредных и (или) опасных производственных факторов работ, при выполнении которых проводятся обязательные предварительные и периодические медицинские осмотры (обследования), и Порядка проведения обязательных предварительных и периодических медицинских осмотров работников, занятых на тяжелых работах и на работах с вредными и (или) опасными условиями труда» кӱштымашыж дене келшышын, медосмотрым ончылгоч да жап шумо еда эртараш тӱҥалме.
Ончылгоч возалтме почеш кугыеҥ-шамычланат, йоча-влакланат стоматологический полышым тичмашын пуаш тӱҥалме. (Приёмыш Кугыжаныш услуго портал гочат возалташ лиеш.) Тыгодым врачын приёмжым вучышо пациент шуко лийшаш огыл, медицине организацийыште противоэпидемический режим пеҥгыдын шукталтшаш.
Пациент-влакын ончылгоч возалтмышт почеш да противоэпидемиологический мероприятий-шамычым шотыш налын, аҥысыр специальностьян врач-влакын первичный специализироватлыме приёмыштым тичмашнек эртараш тӱҥалме.
М.ИВАНОВА
