Специализироватлыме службо-влакым амал деч посна ӱжыктымылан мут кучаш шогалтен кертыт мо?
В.Иванова
Советский район.
Йодышлан Медведево районысо прокурорын полышкалышыже С.Г.Захарова вашештен:
— РФ Административный правам пудыртымаш нерген кодексын 19.13 статьяж дене келшышын, амал деч посна пожарный охраным, полицийым, вашкеполышым да моло специализироватлыме службым ӱжыктымылан 1000 гыч 1500 теҥге марте штрафым тудаш палемден кертыт.
Тидын деч не пырля РФ Уголовный кодексын 306-шо статьяж почеш тидланак уголовно мут кучашат шогалтат. Наказаний семын 120 тӱжем теҥге марте штрафым тӱлаш пуат, але судитлыме еҥын идалыкаш пашадар кугытшо
але моло моло доходшо наре, але 480 шагатлан обязательный пашаш колтат, але кок ий марте исправительный пашаш колтат, але кок ий марте виеш пашам ыштыктат, але пел ийлан арестоватлат, але кок ий марте эрык деч посна кодат.
С.НОСОВА ямдылен
