Марий талешке кече вашеш республикысе Марий тӱвыра рӱдер «Талешке сорта» онлайн-акцийым увертарен.
Кызыт эше тушко ушнаш шонышо-влак йодмашым пуэн кертыт. Чыла кумылан-влак 30 секундан видеороликым mari-centr@mail.ru рӱдерын сайтышкыже колтышаш улыт. Роликыште сортам чӱктышӧ еҥ марий кугыжанышым ыштымашке надырым пыштыше талешке нерген ойлышаш. Кугезына-влакым чапландарыме Марий талешке кечым 1991 ий гыч кугыжаныш кӱкшытыштӧ палемдаш тӱҥалме. Но икымше гана тудым 1917 ийыште Пӱрӧ олаште эртыше икымше Марий калык погын годым эртареныт. Пайремым XVI курымышто илыше да марий калыкын эрыкше верч кучедалше тале марий Полтыш онын лӱмжӧ дене кылденыт.
«Талешке сорта» акцийыш Российысе марий мер организаций, кугыжаныш кучемын еҥже-влак икмыняр ий почела ушнат. Тиде кечын калыкнан историйыште келге кышам кодышо лӱмлӧ еҥ-влаклан пӧлеклалтше шарныктыш воктеке пеледышым пыштат, сортам чӱктат. Коронавирус чер шарлен кертме лӱдышылан кӧра тений тыгай йӧн уке. Марий тӱвыра рӱдер тыгай шотан акцийым ты гана онлайн йӧн дене эртараш темла.
Акций шотышто рашемдымашым 8(8362) 45-88-51 номеран телефон дене налаш лиеш. Кураторжо — Мария Евгеньевна Эшкинина ( 8-917-706-13-34).
С.НОСОВА
