Тыгайже тетла уке

Маммографий йӧн тӱнямбал клинический практикыште эртыше курымын 60-шо ийлаж гыч кучылталтеш, Российыш XXI курым тӱҥалтыште толын да черым вияҥаш тӱҥалме йыжыҥыште улмыж годымак рашемдымыж дене шӧрту рак деч колымо чотым палынак иземдаш полша. Тымарте осал ма сай пуалшым врач-влак вучыдымын муыныт гын, кызыт – вигак гаяк, а келгыш колтымо чер ӱдырамашын маммографийым шукертак эртымыж нерген ойла.

У цифровой маммографым налме марте онкодиспансерыште пленкан аппарат дене пайдаланеныт. Тугеже цифровой системе мо дене сайрак?

– Пленкан системе дене индешлымше ийла мучаш гыч пайдаланенна, – каласкала онкодиспансерын лучевой диагностике отделенийжым вуйлатыше, МарГУ-н лучевой диагностике да онкологий кафедрыжым вуйлатышын пашажым шуктышо, медицине науко кандидат Дмитрий Пасынков. – Тылеч вара технологий пеш шукылан ончыко каен. У аппаратур снимкым ыштыме годым экспозицийым тичмашнек контрольышто куча да тудын качествыжым саемда. Пеҥгыдемше кумдык-влак рашрак койыт. Тылеч посна лучевой нагрузкым кок пачаш нарылан иземдыме, адакше иктаж ситыдымашым верештме але кокытеланымаш лекме годым маммографын эскерымыж почеш вигак биопсийым ышташ йӧн уло. Цифровой сӱретым дискыш войзаш да кӱлмӧ годым интернет дене колташ лиеш.

 Идалык мучко онкодиспансерыште маммографий шымлымашым 4 тӱжем утла ӱдырамаш эрта. У аппаратур диагнозым шындаш, черым вияҥаш тӱҥалме йыжыҥыштыжак рашемдаш да пациент-влакын тазалыкыштым арален кодаш полша.

Врач-влак 40 ияш марте ийготан ӱдырамаш-шамычлан шӧртум УЗИ йӧн дене шымлыкташ темлат, а 45 ий деч вара – идалыклан ик гана маммографыште. 40-45 ияш-шамычлан врачын темлымыжым колышташ кӱлеш. Тудыжо пациентым маммографийышкат, УЗИ-шкат але тышкыжат-тушкыжат колтен кертеш.