СОЦИАЛЬНЫЙ ИЛЫШ

Шекланыза: кайык грипп!

Шекланыза: кайык грипп!

Шылымат, мунымат шолтыза

Пошкудо Татарстан кундемысе «Лаишевский» сурткайык фабрикыште пеш кугу азап лийын: 3 гыч 15 май йотке 15 тӱжем утла чыве колен. Кодшо кечылаште Владимир ола гыч толшо Янлыкын тазалыкшым аралыме федеральный рӱдерын специалистше-влак тыште чыве гриппын геномжым муыныт. Вирусын фабрикыш логалме амалжым эше рашемдыме огыл. Ончылгоч мужедме почеш, тудым кечывалвел гыч чоҥештен толшо ир кайык, фабрикын пашаеҥже-влак конден кертыныт, кормаланат ӱшан уке.

Районышто 21 кечаш карантиным увертарыме деч вара фабрикысе чыла 447 тӱжем чывым пытараш палемдыме. Тидлан кӧра «Деревенька» ужалыме маркан бизнес 100 млн. наре теҥгем йомдара. Фабрикым страховатлыме огыл.

Тыгай азап Марий Элымат авалтен кертеш. Тидымак шотыш налын, Роспотребнадзорын регионысо тӧнежше сурткайыкым кучышо-влаклан икмыняр ой-каҥашым темла:

  • сурткайыкым ир кайык логалдыме верыште ашныман;
  • сурткайык иге ден инкубацийлан ямдылыме муным тергыме еҥ да фабрике гыч веле налман;
  • кормам леведыш йымалне кучыман;
  • сурткайыкын вучыдымын колаш тӱҥалмекыже, жапым шуйкалыде, ветеринар службыш полышым йодын кайыман..

Черланыме икымше пале-влак – сурткайык йӱмым-кочмым чарна, пыстыл шотдымын оварга, шинча ошемеш, кекырек, сога, йол тӱс весемеш, чыве тайныштын ошкылеш, шкенжым молгунамсе гай ок кучо.

Сурткайык шыл ден муным сайын шолтыман.

М.ИВАНОВА.

Опубликовать в Одноклассники

Добавить комментарий