Але кузе тӱрлӧ кундемыште илыше марий-влак У ийым вашлийыт?
Раиса Сунгурова, Сургут олаште ила, тусо «Марий ушемым» вуйлата:
— Юграште илыше йӱдвел марий-влак У ийым кок гана вашлийына. Ондак, ӱстел чесым поген, верысе жап дене тошто У ийым ужатена, ваш-ваш саламлена, шочмо-кушмо вершӧрыш йыҥгыртен, шке поро тыланымашнам ойлена. А вара кок шагат гыч, Моско жап дене уэшын пеҥгыдемден, У ийым суртыш, чоныш, илышыш пуртена. Ме, йӱдвел марий-влак, поснак Шорыкйол пайремым йӧратена. Тыгодым пайрем чеслан эре могай-гынат марий кочкышым ямдылаш тыршена. Кунамже, Васликува да Васликугыза семын чиен, ваш унала миен толашат лиеш. Ты йӱлам поснак Сургут район Федоровский ола шотан поселенийыште кучат. Шорыкйол годым уремыште гармонь йӱкым колаш лиеш.
А Сургут олаште, мутлан, Николаевмыт еш, кажне ийын Роштолан шке кугу тукым родышт дене ялт марий чесан ӱстел йыр марий вургемым чиен чумыргат. Эн чапле сийже — команмелна, туара, салмамуно, пура, тыгак 3 тӱрлӧ шӱрашан да шылан тутло кугу палыш.
Николай Ямаков Одо кундемысе Ижевск олаште ила, «Ижевск Мари» ушемым вуйлата:
— «Ижевск Мари» мер ушемна дене тений 23-шо гана У ийым пырля палемдаш тӱҥалына. Тиде Келшымаш пӧртыштына лиеш. Пашанам иктешлена, ваш-ваш пӧлекым кучыктена, ойыртемалтше-влакым палемдена. Тений паша лектышна сай: Ижевск олаште «Эн сай кочай» национальный конкурсым 5-ше гана эртаренна. «ИжМари» творческий группына тӱрлӧ вере шке мастарлыкшым ончыкта. Моло кундемыште илыше марий-шамычланат, икте-весе дене пырля каҥашен, шке тӱвыранам арален кодымо верч тыршаш тыланена.
Леонид Канакаев Свердловск областьыште ила, фермер озанлык вуйлатыше:
— Урал марий-влак У ийым вес семын эртарат манын каласышашак ок лий. Марла манмыла, чыла шот дене ыштена, эсогыл кугу кӱмыж дене подкогыльым ямдылена. Ондакак кутырен келшена — кӧ уналыкеш мия, а кӧ вашлияш тӱҥалеш. Ӱстембаке чесым чулым погена, родо ден йолташ-влаклан пӧлекым ямдылена. Мутат уке, ача-ава-влак деке чумыргена, икшыве-влакым вучена, вара коча-кова влак деке коштына. Йӱштӧ Кугыза я Лумӱдырыш савырнен, саламлен кошташат перна. Кажныжлан У ийыште тӱрлӧ могырымат перкем тыланыме шуэш, юмо пуымо вий дене чыла шонымашым илышыш пуртен шукташ да У ийын чонышто мом вучеда — шукталтше!
Людмила Мусихина, Озаҥ Марий-влакын калыкле тӱвыра автономийыштым вуйлатыше:
— Озаҥыште илыше марий-влак У ийым вашлияш кодшо кечылаште иквереш чумыргенна ыле. Самырык-влак шукын ыльыч. Чылажат пеш веселан эртыш. Марий кочкыш конкурсым эртарышна. Кӧжӧ почеламутым лудо, кӧжӧ мурым йоҥгалтарыш, кӧжӧ куштыш… Озаҥыште илыше марий-влак пеш мастар улыт. Таклан огыл «Лай мардеж, «Озаҥ мари» ансамбль-влакымат чумырен кертынна.
11 январьыште Шорыкйолым эртараш ямдылалтына. 1 январь гыч «Марий улам» йоча сӱрет конкурс тӱҥалшаш. Тудыжым февральыште Озаҥыште Марий тӱвыра кече-влак вашеш увертаренна. А тудым эртарымашке Келшымаш пӧрт, Татарстанысе калык-влакын ассамблейышт да Марий Элын Тӱвыра, савыктыш да калык паша шотышто министерствыже ушнат.
С.НОСОВА
