27-30 ноябрьыште, 1 декабрьыште «Арена» манежыште мини-лапта дене Российын кубокшо верч таҥасымаш лийын. Команде-влак тений адакат Марий Элыш чумыргеныт.
Ты гана турнирыште вич ӱдырамаш да куд пӧръеҥ команде вийжым терген. Нунын коклаште ӱмашсе чемпион-влакат лийыныт. Тиде Пошкырт кундем гыч ӱдырамаш сборный ден Тюмень область гыч пӧръеҥ команде-влак.
Марий Элын чапшым Провой кундем гыч сборный арален. Тренерже – Г.Евдокимов. Лач ты команде икымше ден кокымшо верлан ӱмашсе чемпион дене модын да 17:18 счёт дене сеҥалтын. Тыге кубок адакат Пошкырт кундемыш «кудалын».
– Ӱдырамаш команде-влак коклаште вий иктєр лийын, сандене кажне вашлиймаш нелын эртен. Чылан чот ямдылалтыныт. Счётыштат кугу ойыртем лийын огыл. Мутлан, 8:5 счёт монь веле. Мемнан команде икоян улмыж дене шерге. Участник-влакат опытан улыт. Кызытракше лач икте, 10-шо классыште тунемше Аделина Васильева, ушнен. Тудат почеш ок код. Можыч, койыш-шоктыш, шукыштын ӱшан лушкыдылык палдырнен, сандене сеҥалтынна, – мане командын капитанже Анастасия Максимова (Бычкова).
Палаш: руш лапта – спортын национальный видше. Таче кечылан тудо элнан 70 регионыштыжо вияҥеш. Руш лаптам Всероссийский кеҥеж универсиадын, Россий кўкшытан ялысе кеҥеж да президент модмашын программышкышт пуртымо. Кумылан-влаклан тиде вид денат тӱрлӧ разрядым, нормативым шукташ йӧн пуалтеш.
Таҥасымаш ик кече веле огыл
Йошкар-Олаште Марий Элын кугыжаныш ден муниципальный кучем орган-влак коклаште спартакиаде эрта. Тудо 30 ноябрьыште стартым налын да 8 декабрь марте шуйна.
Участник-влак волейбол, мини-футбол, шахмат, ӱстембал теннис дене модмаште, иймаште вийыштым тергат. Таҥасымаш Йошкар-Оласе спорт сооруженийлаште («Арена» манеж, «Спартак» ФОК, Вӱд спорт полат) эрта.
Е.ЭШКИНИНА