«Театральное Приволжье» фестивальын Юл кундем федеральный округышто сеҥыше-влакын лӱмышт кодшо кечылаште пале лийын.
Йӱклымаш 29 ноябрьыште 13 шагатлан тӱҥалын. Тудлан стартым Йошкар-Олаште МарГУ пеленысе Сергей Карякинын шахмат школыштыжо пуэныт. Тушко оласе вузлаште, колледжыште тунемше-влак поснак шукын погыненыт ыле. Нунын коклаште фестивальын регионысо этапыштыже сеҥыше кок коллектив — И.С.Палантай лӱмеш тӱвыра да сымыктыш колледжын театр пӧлкаштыже тунемше ден Козьмодемьянск ола гыч «СемьЯ+» театр студий — лийын. Ӱдыр-рвезе-влакым кумылаҥдаш республикын тӱҥ федеральный инспекторжо Петр Журавлёв, тӱвыра, савыктыш да калык паша шотышто министр Константин Иванов, МарГУ-н ректоржо Михаил Швецов миеныт да участник-влаклан сай тыланымашым ойленыт. Йӱклымаш 30 ноябрьыште 13 шагатлан мучашлалтын.
Палемдыман, Юл кундем федеральный округышто эн сай коллектив лӱмым налшаш верч 14 регион гыч 28 коллектив таҥасен. Чылаже 7 тӱжем наре самырык артист мастарлыкым ончыктен. Нуным 100 тӱжем наре еҥ ончен. Тиде проект Россий президент Владимир Путинын увертарыме Театр идалыкыштыже Юл кундем федерал округышто Россий Президентын полномочный представительже Игорь Комаровын полшымыж дене эртаралтын.
Фестивальым иктешлымылан пӧлеклалтше торжественный мероприятийым Юл кундемын чыла регионыштыжо вияш эфир дене онченыт. Мемнан самырык артист да нунын йолташышт-влак тиде кечын Йошкар-Оласе «Ростелекомын» регионысо студийышкыже чумыргеныт. Туштак Марий Эл правительстве председательын икымше алмаштышыже Михаил Васютин, тӱвыра, савыктыш да калык паша шотышто министрын алмаштышыже Михаил Матвеев да молат лийыныт.
Сеҥыше-влакым палемдыме деч ончыч самырык артист-влакын тургыжланымышт сайынак палдырнен. Вияш эфир гоч фестивальын участникше-шамычлан поро тыланымашым Российын калык артистше Андрей Соколов ден театр да кино актёр Андрей Гайдулян ойленыт.
Сеҥыше-влакым профессионал жюрин палемдымыже да калыкын йӱклымыж почеш ойыреныт.
«Школ пеленысе эн сай театр» номинацийыште Башкортостан Республикысе «Пауза» образцовый театр студий сеҥышыш лектын. Тудо «Сказка о Емеле-Лодыре» постановкыж дене ончышо-влаклан келшен. Кокымшо верыш Удмурт Республик, а кумшыш Саратов область лектыныт.
Юл кундем федерал округысо студент театр-влак коклаште Чуваш Республик гыч «Абрикосовый сад» театрже эн сайлан шотлалтын. Ты коллективын ача да йоча кокласе кыл нерген ойлалтше «Мой дедушка был вишней» спектакльже кумылым савырен. Кокымшо верыш Саратов область лектын, а кумшыш – Чуваш Республик.
Тиддеч посна эн сай режиссёрым, эн сай актёр-влакымат палемденыт. Нине номинацийлаштат Чуваш театрынак артистше-влак ойыртемалтыныт.
«Театральное Приволжье» фестивальыште сеҥышыш лекше коллектив-влаклан (у постановкым шындаш) 100 гыч 200 тӱжем теҥге грант да шарнымашан знак дене палемдалтыт. А эн сай режиссёр ден актёр-влаклан Москошто Российысе театрлаште спектакльым ончаш йӧн ышталтеш.
— Йӱклымаш жапыште шӱм чот пырткен, кидкопанат эсогыл пӱжалтын ыле, — ойлат «СемьЯ+» театр студийын ӱдыр-рвезыже-влак. — Туге гынат тиде фестиваль моло регионысо коллектив-шамычын пашаштым ончаш, шинчаончалтышыштым кумдаҥдаш йӧным ыштен, опытым пуэн. Ончыкыжым эшеат чот тыршаш тӱҥалына.
Фестиваль торжественно 16 декабрьыште мучашлалтеш. Тушто Россий Президентын полномочный представительже Игорь Комаров сеҥыше-влакым саламлаш тӱҥалеш.
Алевтина БАЙКОВА
Авторын фотожо
