23 ноябрьыште Звенигово оласе лицейыште Икшывым ончаш налше еш-влакын «МариЯ» ассоциацийыштын, Свято-Никольский храмын, «Единый Россий» партийын «Пеҥгыде еш» проектшын да «Звенигово район» муниципальный образованийын организоватлымышт почеш «Мыйын ешем – мыйын куанем» еш йӱла пайрем лиеш.
Мероприятий кышкарыште Аван кечыжлан пӧлеклалтше «Калык калык верч» еш акций эртаралтеш. Тудо поро шӱм-чонан икшывым ончен куштышо ава-влакым рашемдаш, нунын еш йӱлам арален кодаш тыршымыштым, мер пашаште чолга улмыштым ончыкташ виктаралтын. Ончылгоч увертарыме шым номинацийыште кугу ешан, шочшым шкет ончен куштышо, икшывым ашнаш налше, кидпашам йӧратыше, профессий династийым умбакыже шуйышо, спортсмен, мер пашам шуктышо ава-влак мастарлыкыштым терген кертыт.
Организатор-влак мероприятийыште участвоватлыше ава-шамычлан пӧлекым – ешыште пайдаланаш йӧршӧ иктаж арверым – верысе калыклан ямдылаш да сценыште кучыкташ темлат. Тидыже, мутат уке, калыкым икте-весе деке чак ыштыме пеш оҥай йӧн.
М.ИВАНОВА
