УВЕР ЙОГЫН

Сардаялыште кумшо гана

Марий Турек районысо Сардаял  школышто Москвасе «Кружок» командын еҥже-влак угыч толын коштыныт да эше ик гана ты кундем нерген уло тӱням палдараш йӧным почыныт.

 «Кружок» – тиде эрыкан образовательный проект. Туныктышо, энтузиаст, самырык профессионал-влак изи ола, села ден яллаш мият да ийготыш шудымо-шамычлан тӱрлӧ направлений дене арня але утаракат жапыште яра туныктат. Такшым, «Кружок» ты ялыште ынде кумшо кугу мероприятийым эртара. 2018 ий мартыште тудын еҥже-влак тусо школыш толын коштыныт, веб-сайтым ышташ туныктен каеныт. Тунам  тунемше-влак шке школыштын веб-сайтшым ыштеныт. Кодшо ийын кеҥежым кугу тӱвыра фестиваль эртен. Тӱрлӧ темылан лекций, мастер-класс-влак, Санкт-Петербург гыч толшо группын концертше эртеныт. Ты мероприятийже уло ял калыкым кожгатен ыле. Командировкыш мийыме годым ме чыла тидым шке шинча дене эскеренна. А теве кызыт ынде «Кружок» команде тыште кандаш кечаш журналистике школым эртарен. Пырля «Strelka Mag» журналын тӱҥ редакторжо Соня Эльтерман ден «Известия» савыктышын продюссерже Игнат Шестаковым конден. Школын лектышыже теве могай лийшаш – Сардаял да тудын калыкше нерген газет лекшаш.

Кажне кечын тунемше-влак журналист пашалан тунемыныт: планеркыш чумыргеныт, увер ден интервьюм, фоторепортажым ямдыленыт, статьялан вуймутым шоненыт. Москва гыч толшо туныктышо-влак лекцийым гына лудын огытыл, йоча-влакым шкеныштымак журналист семын пашам ышташ туныктеныт. Мутат уке, тыге нуно ты сомыл дене лишкырак да сайрак палыме лийын кертыныт.

Школым эртараш организатор-влак 230 теҥге дене погеныт. Журналистике дене тыгай тунеммашым «Кружок» тений икымше гана эртарен. Но проектын вуйлатышыже Сергей Нугуевын палемдымыж почеш, тудо поро йӱлаш савырнен кертеш.

 С.НОСОВА.

Снимкылаште: Сардаляште эртарыме журналист школ годым.

Фотом школын сайтше гыч налме

Опубликовать в Одноклассники

Добавить комментарий