11 июль гыч 15 июль марте Провой кундем гыч «Ӱшанлык» калык фольклор ансамбльлан Венгрийыш миен кошташ пиал логалын.
Тусо Зриц олаште путешественник, этнограф Антал Регулин шочмыжлан 200 ий темме лӱмеш фестиваль эртен. Пайремыш марий, хант, манси, ненец, удмурт, мордва калык да усталык коллектив-влак погыненыт.
Фестиваль Регулин лӱмжым нумалше тоштерыште эртен. Мемнан ансамбльнан чолга участникше Светлана Ильина Тӱп калык-влакын идалыкыштлан пӧлеклалтше семинарыште шочмо йылме нерген презентацийым ыштен. Тудо Какшамарий кундемыште марий йылмын верже нерген каласкален. Чылан куанен колыштыныт, шуко йодышым пуэныт.
Варажым уна-влак муреныт, куштеныт, калык куштымаш дене мастер-классым ончыктеныт.
Кидмастар-влакын выставкыштат оҥайын эртен. Ансамбльын вес участникше Галина Чернова марий тӱр нерген каласкален, кумылан-влакым тӱрлашат туныктен.
Кумшо кечын Регули лӱмеш каныш паркым почыныт. Туштат «Ӱшанлык» ансамбль жапым яра эртарен огыл, шке кундемысе мурыжым мурен, гармонь почеш куштымашыжым ончыктен. Тусо калыкат рӱж тавалташ лектын.
Мероприятий мучаште чыла кундем гыч мийыше уна-влакым семӱзгар дене шокташ сценыш ӱжыныт. Тушто марийжат, хантшат, ненецшат, удмуртшат шке семӱзгарышт дене семым луктыныт. Тыгодым венгр-влак шке мурыштым муреныт, а ончаш погынышо-шамыч куштеныт.
Фестивальым иктешлыме годым чылалан дипломым да пӧлекым кучыктеныт. Зирц — пеш мотор ола. Йырваш – уремыштат, сурт коклаштат – пеледыш.
Калыкшат пеш поро. Икте-весын йылмым пален огынал гынат, ваш-ваш пеш сайын умыленна.
Пытартыш кечын мемнам Будапешт олаш наҥгаеныт. Тушто мом гына ужаш логалын огыл: герой-влаклан пӧлеклалтше площадьым, Дунай эҥерым, парламентым, панорамым да молымат. Зирц ола семынак Будапешт пеш сӧрал, мыланна пеш келшен.
Венгрийыш миен кошташ спонсор-влак, Чуваший гыч Какшамарий ялышке канаш толшо-влак изиш полшеныт. Нунылан ансамбль пеш кугу таум каласа.
А Венгрийыш миен коштмо мемнан шӱмыштыша шуко жаплан шарнаш кодеш.
Надежда Мишина,
«Ӱшанлык» ансамбль вуйлатышыже.
Фотом ансамбльын альбомжо гыч налме
