12 гыч 20 июль марте Йошкар-Олаште Инвалид-влакын III всероссийский кеҥеж спартакидышт эрта.
Тушко Российын 65 регионжо гыч кок тӱжем утла еҥ ушнен. Спартакиадын финал таҥасымашыштыже сокыр, соҥгыра, уш-акыл шотышто экшыкан, церебральный паралич черан да ошкылмо-тарванылме шотышто йӧсланыше-влак бочча, куштылго атлетике, ӱстембал теннис, иймаш, голбол, дзюдо, футбол дисциплинылаште чолгалыкым ончыктат.
Челябинск область гыч толшо Александр Ильин, Данил Середа, Максим Снегов ошкылмо-тарванылме шотышто йӧсланыше-влак коклаште иймаште таҥасеныт. Александр икымше кечынак шӧртньӧ медаль дене палемдалтын.
— Иймаш спортлан йочасадыш коштмо годымак шӱмаҥынам. Иймаш кап-кылым пеҥгыдемдаш полша. Тидын нерген эмлыше-влакат ойленыт. Тӱҥалтыште тазалыкым пеҥгыдемдыме шот дене бассейныш коштынам, а варажым тудо спортыш савырнен. Шуко вере таҥасымаште лийынам, Россий кӱкшытанжак 11 лиеш. Шарнем, кок ий ончыч Российын чемпионатше эртыш. Тушто мый икымше гана бронзо медальым сеҥен налынам. Тиде сеҥымаш эшеат чот таҥасаш таратен, — куанжым пайла Александр.
— Спартакиаде кугу кӱкшытыштӧ эрта. Организатор-влакын чот ямдылалтмышт шижалтеш. Поснак кугу таум волонтёр-влаклан ойлыман. Нуно тыматле койыш-шоктышан, поро улмышт дене чыла ойгым мондыктарат. Шке пашаштым сайын палат. Таҥасымашлан спорт объект-влакымат шот дене ямдылыме, эсогыл каныш жапна нерген азапланеныт: концерт, экскурсий да молат. Чылалан моткоч кугу тау! — ойла Данил.
А.Байкова.
Авторын фотожо
