12 июньышто Йошкар-Олаште илыше, Кугу Отечественный сарын ветеранже Любовь Алексеевна Ласточкина 95 ияш лӱмгечыжым палемден.
Кугу юбилейже дене да Российын кечыж дене тудым саламлаш Марий Эл правительстве председательын алмаштышыже Степан Воронцов, Республикын социальный вияҥмаш министерствыжын еҥже да Йошкар-Оласе ракет дивизийын военнослужащийже-влак миеныт.
— Таче мылам кугу пашам ӱшаненыт. Любовь Алексеевна, Тендам Россий Президент Владимир Путинын да Марий Эл вуйлатыше Александр Александрович Евстифеевын кӱштымышт почеш саламлаш толынам. Уло кумылын тиде пашам шуктем да тыланда тазалыкым, кужу ӱмырым да чыла сайым тыланем. Тек уныкада-влак чӱчкыдынрак толын коштыт да тендам куандарат, — манын С.Воронцов да пӧлек ден пеледыш аршашым кучыктен.
Л.Ласточкина уна-влакын толмыштлан моткоч куанен, чылт йочала йывыртымыже шижалтын. Тудо кажныжлан тауштен каласен да пайрем ӱстел деке шинчаш ӱжын.
А.БАЙКОВА
М.Скобелевын фотожо
