27-30 мартыште Тольяттиште «Волга-Юнпресс-2019» фестиваль эртен.
Тушко Российын 37 регионжо гыч 250 утла участник ушнен. Йошкар-Олан чапшым «ЗУМ» йоча киностудий (М.Киселёв, М.Долгоруков, И.Еропов, Е.Мамаева, Д.Кандаков, А.Мельникова, А.Старикова) арален. Тиде студийыш кызытат усталык шӱлышан да журналистикылан шӱман йоча-влакым вучат.
Студийыш коштшо-влакын мутышт почеш, фестиваль жапыште нунылан тӱрлӧ мероприятий, экскурсий эртен. Ӱдыр-рвезе-шамыч телевӱдышылан кастингым эртыме нерген пален налыныт, Тольятти олан мотор верлажым ончен савырненыт, «Жигулёвская долина» технопаркыште, «LADA» автомобиль тоштерыште, «Замок Гарибальди» турист комплексыште лийыныт, тыгак «Что? Где? Когда?» модышышто уш-акылым тергеныт.
А эн чотшо, мутат уке, икшыве-влаклан Российыште чапланыше телевӱдышӧ, кинорежиссёр, оператор-влакын, тыгак «Полёт квадрокоптера» мастер-класс-влак оҥайын эртеныт, а ВГИК-ыш кузе тунемаш пурымо да мом тушто туныктымо нерген пален налыныт.
Конкурсын программышкыже 218 паша (заочно) пурен, тиддеч посна фестиваль жапыште 39 видеосюжет ямдылалтын. Фестивальыште паша-влакым 12 номинацийыште ойыреныт. А Республикысе изосымыктыш тоштер пеленысе «ЗУМ» йоча киностудий вич номинацийыште икымше степенян лауреат лӱм дене палемдалтын, тиддеч посна ик дипломым кокымшо, да кок дипломым кумшо степенян лауреат лӱм дене налыныт.
Тынар шуко сеҥымаш дене але марте мемнан-влак палемдалтын огытыл улмаш, сандене ты гана моткоч нӧлталтше кумыл дене марий мландышке пӧртылыныт.
А.Байкова
