Волжскышто палыме тиде амалкалчылан, уста парикмахерлан, мый тыгай йодышым пуышым: «Парикмахер лияш Тыланда мо – паша але усталык?» А тудо вашештыш: «Кумыл савыртыш». Але хобби манмет. Но вара садыгак тыгай шонымашке тольо: «Усталык». Але творчестве.
Эше школышто, визымше-кудымшо класслаште, тунеммыж годым тудо, Юлия, сай причёскан фотографийлам да тидын нерген возымым газет ден журналла гыч пӱчкеден поген. Вара тудын почеш шканже, йолташ ӱдыржӧ-влаклан, акажлан эксперимент шот дене причёскым ыштыл ончен. Молан, шонеда? Идалыклан кок гана Йӱдвел гыч толмекыже, парикмахер чӱчӱньыжӧ родо-влакым нунын дене чумырен да кумылан кажне еҥын ӱпшым тӧрлатен пуэн. Ӱдыр тидым тӱткын эскерен да вара тудынлак ышташ тӧчен. Тыгак тиде пашалан кумылаҥын.
Туге гынат школ деч вара вигак ты корныш шогалаш вашкен огыл. Математикым йӧратымыжлан кӧра экономист-бухгалтерлан тунемаш пурен, но вара кудалтен. Сӱретлаш мастар улмыжлан кӧра (художественный школыштат тунеммын) пӧрткӧргым сӧрастарыше фирмыштат ыштен ончен, но адакат тушеч каен… Коло вич ий марте тудо илышыште шке вержым тыге кычалын. Лач причёскым (шканже, палымыже-влаклан) ыштылмым чарнен огыл. Парикмахер паша кумыл савыртышак лийын кодын. Да, мо шонеда, ты корнымак вара ойырен налын.
— А парикмахержылан лӱмын тунемын огыдал? – мыят лӱмын гай йодым.
— Уке, вигак пашалан пижым. Пашам ыштышылак тунемаш тӱҥальым, — нимыняр нелеш налде вашештыш Юлия Александровна.
Тунам тудо кокымшо йоча дене мӱшкыран лийын, сандене пашашке нигуш налын огытыл. Тудын мастарлыкшым ужшо да пагалыше еҥ Памар тӱвыра пӧртыштӧ ӱп тӱредме верым почаш полшен. Теве мо тудлан у шӱлышым пуэн. А йочам ыштымекыже, увертарымаш почеш мӧҥгышкыжӧ тӱредыкташ кошташ тӱҥалыныт. Тунамат йӧратыме пашаж деч посна шинчен сеҥен огыл. Икшывыжын йочасадыш кошташ тӱҥалмым вучен шуктен да Волжскыштак палыме парикмахерскийлашке корным такыртен: ончыч – «Эдемыш», вара – «Гламурыш»… Манмыла, кугурак ден сайракыш.
— Изираклашкыже каяш кумыл лийын огыл. Мылам тугайыште ышташ келша, кушто кушкаш тыршат, молан-гынат тунемаш лиеш, — каласыш предприниматель Ю.А.Молофеева.
Ынде тудо шкежат — «Секрет» манме моторлык салонын озаже. Ты салонын шке «секретшат» уло. Юлия Александровна икымше пелашыж дене илыме годым бизнесым пырля виктарен колташ кугу кредитым налын улмаш. Но еш шаланен, да тудо ты окса дене кок пӧлеман пачерым налын. А кокымшо пелаш дене илаш тӱҥалмеке, пачерым моторлык салоныш савырен. Икымше дене огыл гын, кокымшо дене шонымыжым шуктен. Ешартышлан кумшо икшывым шочыктен, но тегак кумыл савырыше пашам ыштымым чарнен огыл.
Моторлык салонышто кызыт визытын тыршат. Ӱп тӱредше мастар Юлия Молофеевалан самырык парикмахер Юлия Тимофеева да ты пашалан тунемше Анна Фролова полшат. Тылеч посна Виктория Кудрявцева кӱчым тӧрлышӧ мастарлан, а Мария Опарина эстетист-косметологлан шотлалтыт. Нунак солярий услугым пуат.
— Но ме тидын дене гына огына серлаге, шонем. Творчески кушкаш шонышылан корно тышке эре почмо лиеш, — ешарыш Юлия Александровна.
А шкенжын ик дипломжым веле огыл пырдыжыште ужаш логале. Теве иктыште пӧръеҥ причёско шотышто мастар стилист Ника Бинешын кок кечаш курсшым эртыме нерген ойлалтеш. Парикмахер сымыктыш шотышто тӱнян кок гана чемпионжо, тӱнямбал классан мастар, моторлык тӱнямбал академийын президентше Георгий Котын кидшым пыштыман диплом причёскым сайын ыштымылан пуалтын. Тений шошым Молофеева Москвасе колористике да геометрий академийыш квалификацийым нӧлтымӧ вич кечаш тӱредме курсыш каяш шона. Теве кушто да кузе тудо тунемеш парикмахер пашалан — усталыклан.
Юрий Исаков.
Авторын фотожо.
