Тачысе кечылан Марий Элыште кугыжанышын аралыме шулдыр йымакыже пуртымо 58 кумдык уло. Но тиде радамыш эше икмыняр у объектым пуртен кертыт.
Молан манаш гын 2015 ий гыч ты шотышто республикысе эколог-влак шымлыме пашам эртарат. Мутлан, «Кугу Какшан» заповедникын специалистше-влак республикыште эше 62 тыгай у объектым палемдаш лийме нерген темлымаш дене Марий Элын Пӱртӱс поянлык, экологий да йырым-йырысе средам аралыме министерствышкыже лектыныт. Тений кеҥежым нуно Юрино районсо Патъяр ерым да воктенысе кумдыкшым шымленыт. Ты пашаште «Научный да социальный инициативе рӱдер» АНО-н, Марий кугыжаныш университетын специалистше-влак полшеныт.
Тиде ерже Ортын эҥер деч тораште огыл купан да чодыран кумдыкышто верланен. Эҥерже ончыч Перша, вара Люнда эҥерлаш йоген кая. 8 километр тораштырак Васильевский села уло. Ер кугу огыл, 6.3 гектарым айла, келгытше — 5,5 метр. Шымлыше-влак тушто да воктенысе чодыраште кушшо 133 кушкылым рашемденыт. Ерыште да воктенысе купышто Марий Элын Йошкар книгашкыже пуртымо кандаш тӱрлӧ кушкыл шочеш. Коклаште шуэн вашлиялтшыжат улыт. Тыгак 62 тӱрлӧ насекомый, 69 тӱрлӧ кайык илат. Марий Элын Йошкар книгашкыже пуртымо 4 янлыкат лектын. Эсогыл медицине чывытан уло. Санденак эколог-влак тиде ерым кугыжанышын аралыме пӱртӱс кумдык радамышкыже пурташ темлат.
С.Носова.
