22 декабрь – Энергетикын кечыже
Жаплан келшыше да ӱшанле
«Рӱдӧ да Юл кундем Россеть» ПАО-лан вуйын шогышо «Рӱдӧ Россеть» ПАО-н генеральный директоржо Игорь Маковский журналист-влак дене идалык мучаште, Энергетикын кечыж вашеш, вашлиймашым эртарен. Тудо 2024 ийым иктешлен да пытартыш куд ий жапыште компанийын тӱҥ ошкыллажым палемден ончыктен.
Вашлиймаш компанийын шукерте огыл почылтшо координационный рӱдерыштыже лийын. Вуйлатыше тушко пурышо данный негызеш виктарен шогымо у йӧн дене палдарен.
Кум шагат утла шуйнышо пресс-конференцийыште ончыл федерал СМИ-влакын еҥышт лийыныт. Тыгак филиалласе регионал студийла гыч тусо 94 журналист Игорь Маковскийлан онлайн йӧн дене йодышым пуэн кертын.
Тӱҥалтыш ойыштыжо вуйлатыше палемден: 2024 ий у йодмаш ден йӧнлан поян лийын. Сайын шоналтен виктарымылан кӧра «Рӱдӧ Россеть» ГК пеҥгыдылыкым гына огыл арален коден, тыгак чыла тӱҥ показатель дене кушмым ончыктен. Тидын шотыштак «Ӱшанлык» показатель велым ончалмаште электровий кодшо ийысе деч 33 процентлан шагалрак йӧралтын да тиде жап 2018 ийысе деч 30 процентлан кӱчыкемын. Инвестиций программе кугыт 57 миллиард теҥгеш шуын, але 2018 ийысе деч кок пачаш кугемын.
Пытартыш ийласе тӱҥ ошкыл семын филиаллаште сетьым виктарыме да жаплан келшыше 21 рӱдерым почмым ончыкташ лиеш. Тыгодым шкенан элысе цифр технологийым кучылтмо. А тудо энергийым шеледен колтымо чыла тӱрлӧ сетьым шинча ончылно кучаш да ӱшанлын виктараш, вучыдымо кеч-могай азаплан писын вашешташ полша.
Тидат веле огыл, нине рӱдер-влак чек воктенысе регионлаште неле задачылам шуктен шогат. Тушто энергетик-влаклан вес велым энергообъектлашке лӱйкалымым эреак ужашышт перна. 2024 ийыште 2,5 тӱжем утла тыгай случай лийын. Тыгодым нуно кӱрылтышым писын тӧрлат, лийме семын шапаш источникым кучылтыт але вес технологийлан эҥертат. Азаплан писын вашештыше группировкым ыштыме, тушко шке профессионал порысыштым кеч-могай лӱдыкшыштӧ шукташ ямде улшо специалист-влакым чумырымо.
Игорь Маковский палемден: энергокомпаний-влакын шумо чыла сеҥымашышт – тиде профессионал-влакын тӱшкан ыштыме пашашт. «Рӱдӧ Россеть» ГК – элыштына пашам пуышо ик эн кугу да кечыгут кӱрылтде ыштыше предприятий. Тушто 56 тӱжем еҥ тырша, сандене компанийыште социальный паша тӱткын эскералтеш да шукталтеш. Таклан огыл «Рӱдӧ Россеть» пашам ӱшанлын ыштыме, еҥ-влак верч мутым кучымо да тыршыме йӱлаж дене чаплана.
«Мемнан командына компанийнан отрасльыште ончылно кайыше-влак коклаште налын шогымо вержым ий гыч ийыш пеҥгыдемда. Ме ятыр миллион еҥлан кызытсе жаплан келшыше, ӱшанле да лӱдыкшыдымӧ энергосистемым ыштена. Командына пашаште пайдалыкым ончыкта, производствысо да элысе кугу задачым шукташ эре ямде», – каласен Игорь Маковский.
Юрий ИСАКОВ ямдылен
Фотом ИнформБюрон телеграм-каналже деч налме
