Ончыч тӱрыс тӱлыман
ЖСК дене ойпидышым ыштен, пачерым налынам, но кызытеш погылан правам регистрироватлен шуктен омыл. Санденак рашемдынем: налог вычетым ыштен кертам мо?
А.Семенова
Йошкар-Ола.
Йодышлан Медведево районысо прокурорын полышкалышыже С.Захарова вашештен:
– РФ Финанс министерствын «Жилищно-строительный кооператив (ЖСК) дене ойпидышым ыштен, физический лицан пачерым налмыж годым погылан налог вычетым пуымо нерген» серышыж почеш (27.03.2017), тыге пачерым налме годым НДФЛ дене налог вычетым ышташ правам, пайым тичмашын тӱлымеке, тыгак передаточный акт негызеш гына пуат.
Сандене ЖСК членын погылан праваже пай взносым тӱрыс тӱлымекыже гына лиеш, а пачерлан кугыжаныш регистрацийым ыштыме дене тиде ок кылдалт.
Налогым тӱлышӧ ЖСК член налог вычетым РФ Налог кодексын 1-ше статьяжын 3-шо ден 4-ше пунктлаж дене келшышын налын кертеш. Тыгай праваже шочын гын, тудо налог органыш пайым тӱрыс тӱлымӧ нерген справкым, тыгак передаточный актым, але тудо уке гын, пӧртым эксплуатацийыш колташ разрешенийын копийжым наҥгайышаш.
Вате-марий – мужыр оҥгыр…
Вате-марий кокла гыч иктыже индивидуальный предприниматель семын банкортыш лектын гын, нунын погыштым кузе аклен пайдаланат.
Йодышлан вашмутым Медведево районысо покурорын полышкалышыже С.Захарова вашештен:
– Закон почеш, еш семын илыме годым вате-марийын погышт пырля чумырымо погылан шотлалтеш. РФ Еш Кодекс тидымак ойла. Вате але марийым банкротлан шотлымо гын, тудын погыжо конкурсный управляющийын кидышкыже кусна. Тидын годым банкротыш лекдыме ватыже але марийже еш дене илыме жапыште пырля чумырымо погым шонымо семын шеледен огеш керт.
Закон почеш банкортыш лекшын погыж гыч гына кредитор оксам кӱрын луктын кертеш. Но погыжо шагал гын, кредитор весыж дечат оксам ойыраш йодаш праван. Тыште теве мо шотыш налалтеш, вате марийын ойырлымышт годым погым пеле гыч шелме ужашыжым банкротыш лекшылан мыняр пуышашым ончат.
Но кусараш лийме пого парыман вате але марийынлан гына шотлалтеш але тудо погылан шкетын гына праван гын, але кусараш лийме погылан единый кугыжаныш реестрыште тудын лӱмжӧ веле гын, конкурсный управляющий тудым гына конкурсный массыш пурта. Тидын годым еш мужырын вес пелыже конкурсный управляющийын ошкылжо дене огеш келше гын, тудо общий радам дене вате марийын погыштым пеле гыч шелме да пелашыжлан ужашыжым ойырымо шотышо судыш йодмашым пуэн кертеш. Тыгак ты погылан коктынат праван улмым пеҥгыдемдаш манын йодмашымат возаш лиеш.
Вате-марий кокла гыч иктыжын пуымо еш погым шелме нерген искшым конкурс производство кайыме годым тудым ужалымеке да оксам налын шелмеке ончат.
С.Носова ямдылен
