Таче, Россий Вооруженный Вийын Украиныште специальный военный операцийым эртарымыж жапыште, элыштына кажне еҥ нацизм ден неонацизмым пытарымаште, тыныс да ласка илышым лишемдымаште пайдале лийнеже.
Марий Элым вуйлатыше Юрий Зайцевын палемдымыж почеш, СВО-шко республикна гыч 1748 пӧръеҥ каен. Нуно чыланат ала-кӧн эргыже, изаже, шольыжо, марийже, йӧратыме таҥже, ачаже але просто йолташыже улыт. Пӱрымашышт верч лишыл еҥышт веле огыл тургыжланат, республикыште илыше чумыр калык азаплана.
Регионна сарзе-землякше-влаклан тӱрлӧ семын полша. Мутна – СВО-м эртарыме кумдыкыш тылзе еда кугу гуманитар грузым поген колтымо нерген. Тыштыже поснак «Аван шӱмжӧ» («Сердце матери») гуманитар толкынын пашажым палемдыман. Тудын волонтёржо-влак военнослужащий-шамыч дене пеҥгыде кылым кучат да нунын йодмашыштым тичмашнек гаяк шукташ тыршат.
– Таче сарзына-влаклан изи да вич литран газ баллон, плита, тактический перчатке моткочак кӱлыт. Палемдыме оборудованийлам кевытлаште налаш лиеш гын, парняшан пижым ӱдырамаш-шамыч шкеак пидын пуэн кертыт, – палдара гуманитар толкынын координаторжо Тамара Авгученко. – Калыкнан поро кумылжо куандара. Теве таче марий амалкалче Борис Иванов адакат 18 коробка, рашемденрак каласаш гын 432 пачке, шытыктарыме шыдаҥ лапчыкым конден. Тиде продукцийын пайдалыкше нерген ушештараш огеш кӱл, шонем. Тудым чыла марий сарзылан полшышо «Ямпил» позывноян землякна Виктор Цыренов военнослужащий-влакын лӱмышт дене йодын. «Кертыда гын, шолшо вӱд дене лывыжтарен кочкаш лийме «геркулесдам» колтыза. Тудо моткочак питательный да витаминлан поян. Мый шкежат тушитлыме шыл дене варен кочкаш йӧратем», – возен йодмашыштыже. Тидлан Борис Владимирович моткоч куанен да продукцийжым офисышкына лишыл кечылаштак конден шынден. Тудын семын полшышо-влак шукынрак лийыт гын, сеҥымашыжымат писынрак лишемдена ыле.
«Аван шӱмжӧ» гуманитар толкын деч полышым йодын возымо серышым налмекыже, Борис Владимирович шытыктарыме шыдаҥ лапчыкым лӱмынак сарзе землякна-влаклан ямдылен.
– Кеч тыге полшем, – мане шкеже.
Военнослужащий-влак тыгак дизелян генераторым, дрон ваштареш пычал ден одеялым, квадрокоптерым, йӱдым ужаш лийме приборым, тепловизорым, УАЗ автомашиналан теле оравам, лазерный принтерым, картриджлан тонерым, А4 форматан кагазым, газ дене ырыктыме оборудованийым, кольмым, товарым, ножовкым, киркам, теле упшым, пидме шокшо калпакым, парняшан теле пижым, футболкым, шокшо йымал вургемым, термоодеялым, пеҥгыде плёнко ден фольгоизолоным, окопышто пайдаланыме сортам, туристический коврикым, шылан пучымышым, тушитлыме шылым, колан консервым, шере кочкышым, мӱйым, тӱрлӧ витаминым, гематогеным, антибиотикым, воспалений да шок деч препаратым, сакаш лийме кӧгӧным, маскироватлыше сеткым вучат.
СВО-шко черетан гуманитар грузым тиде арня мучаште наҥгаяш палемдыме. Вес грузым У ий вашеш погат. Окса надырым, «поро пашалан» але «сеҥымашлан» манын палемден, толкынын волонтёржо Светлана Николаевна Корчагинан 2202 2036 1365 5283 номеран сберкартышкыже колташ але, кӱлешан сатум шке налын, Йошкар-Олаште Эшкинин уремысе 10-шо Б №-ан пӧртыштӧ верланыше 201-ше офисыш намиен пуаш, тыгак счёт почеш тӱлаш спонсорым муаш лиеш.
Юмо мемнан дене пырля! Ме садак сеҥена!
Маргарита ИВАНОВА
Авторын фотожо
