Кодшо кугарнян «Поле Чудес» телешоушто Курыкмарий район гыч фермер, Кугыжаныш Погын депутат Сергей Ильин модын, а Йоласал тӱвыра да ремесло пӧртын «Шӹжарвлӓ» ансамбльже мастарлыкым ончыктен.
– «Юзо пасу» телепередачыш кайыме шотышто мутланымаш эше мартыштак тӱҥалын. Козьмодемьянск гыч родем Игорь Петухов йыҥгыртен да пелашыже Эмма Ильинична дене пырля ты передачыш коллектив дене каяш темлен. Шуко шоналтыде, вигак келшышым, – каласкала ансамбльым ятыр ий вуйлатыше, Россий культурын сулло пашаеҥже, РФ правительствын «Душа России» премийжын лауреатше Фаина Эшмякова. – Вес кечын телепрограммын редакторжо дене кечыгут манме гай передачыште шоктышашлык муро шотышто каҥашенна. Тушко колтымо видеозаписьнам я йокрок, я утыждене кужун шуйдарыме маныныт. Варажым Кремльыште ончыктымо Курыкмарий мурен-куштымаш видеом колтышым. Тидыже нунылан пеш келшен.
Вес семынже лийынжат кертын огыл, вет тиде мурсем тыглай огыл: кӱслезе-влакын семӱзгар кылым кажне гана тарватымыштлан шӱртӧ дене парняш пижыктыме курчакышт южышто веселан чӱчкен, кӱнчылавондым шӱдыреныт.
– Но варажым вашталтыш лийын, Эмма Ильиничналан усталык коллектив деч посна толаш ойленыт. Тудо жаплан такшым шыгыр жап ыле да, утыждене ышна ойгыро. А теве икмыняр кече гыч уэш программын редакторжо Наталья йыҥгыртен да передачыште вучаш тӱҥалмышт нерген каласен. А эн тӱҥжӧ иктаж модшым кычалаш темлен. – чонжым почо Фаина Викторовна. – Пашаште туныктышо-влак дене пырля каҥашымеке, шкенан кундемысе фермер, Марий Эл Кугыжаныш Погын депутат Сергей Ильинлан темлышна. Чолга самырык землякна передачыш каяш гына огыл, мыланнат, ансамбльын участникше-влаклан, корно, унагудышто илыме роскотлам тӱлаш келшыш!
Сергей Ильин передачыш пелашыж дене миен. Тудо кокымшо турышто модын. Барабаным пӧрдыктымекыже, «Шыжарвлӓ» ансамбльлан мастарлыкым ончыкташ жап пуалтын. Кӱслезе-влакын кӱсле сем почеш йонгалтарыме весела такмакышт Леонид Якубовичланат да зал калыкланат чот келшен. Шокшо кидсовыш дене туштымышт марий шӱлышан кажне еҥлан кугешнаш амалым пуэн. Сергей Григорьевич тичмаш мутышто ик буквам йоҥылыш ойлымыж дене финалыш лектын ыш керт.
– Передачыште мутым пален омыл гынат, нимыняр ом ойгыро, вет куанымем дене Якубовичын заданийжымат монденам ыле. Тӱҥжӧ – уло тӱнямбал калык кӱслем ужын да ныжыл йӱкан, ю шӱлышан семжым колын да Курыкмарий кундемна нерген кеч изиш пален налыныт. Тидымак ме ик эн тӱҥлан шотлена, – ойла шуко йочан ача. – 23 майыште передачым ончыктымо деч вара палыме, йолташ-влак, родо-тукым кокла гыч йыҥгыртыше-влак пеш шукын лийыныт. Вет ме съёмко нерген пешыжак нигӧлан палдарен огынал. А икшывына-шамыч мочол куаненыт?!
Передачым вӱдышылан Сергей Ильин изи кӱслем, Козьмодемьянск олан историйже да курыкмарий сӱан нерген книгам пӧлеклен, Юл эҥер воктене ий еда эртаралтше «Бендериаде» мыскара да койдарчык фестивальыш ӱжын.
Пашаче кумылан, чолга, талантан да усталык шӱлышан еҥ-влаклан кӧра кундемна чаплана да калыкна нерген пӱтынь элыштына илыше-влак пален налыт. Тек тыгайышт шукырак лийыт!
Фотом ансамбльын архивше гыч налме
