Марий Эл вуйлатыше Юрий Зайцев «Яндекс» компанийын регонла дене паша кыл шотышто директоржо Антон Москаленков дене ойпидышым подписатленыт.
Республикын да IT-компанийын планышт кугу. Мутлан, туныктымо проект-влакым вияҥдаш, «Поиск по архивам» сервисыште Марий Эл кугыжаныш архивын архив документлажым вераҥдаш, Яндексын сервислаштыже марий шомакым синтезироватлыме пашаммаш, «Туризм» направлений дене кылдалтше сомылым виктараш, моло проектымат илышыш шыҥдараш палемдат. Тыгак тиде сервис полшымо дене Марий Элын ик эн сылне верлаже-влакын 3D модельыштым ончаш йӧн лиеш. Тиде регионысо калыкын илышыжым куштылемдаш полшышаш.
Марий Элын Тӱвыра, савыктыш да калык-влакын пашашт шотышто министерстват «Яндекс» компаний дене архивысе документым цифровизироватлыме шотышто ойпидышым пеҥгыдемден.
Ты проект тӱвыра поянлыкым арален кодымылан пӧлеклалтын да тудын дене шукырак еҥ пайдаланен кертше манын ышталтын. Документыште шке кидпалыштым республикын Марий Эл Правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ден «Яндекс» компанийын регионла дене паша кыл шотышто директоржо Антон Москаленков пыштеныт.
Каласыман, «Яндекс» компаний Марий Эл дене 2016 ий гычак пашам ышта. Тунам марий йылмым «Яндекс.Переводчик» сервисыш ешареныт. Таче кечылан специалист-влак тушко марий йылме дене савыкталтше литератур гыч 22 миллион ойсавыртышым пуртеныт.
Д.Речкинын фотожо/ Марий Эл вуйлатышын пресс-службыжо
