Теле мамык гай пушкыдо да ош лумжо, сылне пӱртӱсшӧ дене кажне чонаным куандара. Тидлан изижге-кугужге йывыртен, лум кугызам але иктаж янлыкым ненчат, курык гыч мунчалтат, ечыгорныш лектыт.
А те, йолташ-влак, луман жапым йӧратеда? Ты пагытыште поснак мом ышташ келша?
Валентина ВАСИЛЬЕВА, Марий Элын калык туныктышыжо:
– Идалыкын кажне пагытше – шкешотан, а теле яндар ош тÿcшö дене моткоч сöрал. Ты пагытыште, поснак левырак игече годым пӱртӱсыштӧ лияш, свежа южым шӱлалтен кошташ да йыр улшо моторлыкым эскераш келша. Поснак пӧршаҥше пушеҥгым ужмеке, йомак кугыжанышыш логалмыла чучеш.
Эльвира ТОКТАШЕВА, Самырык-влаклан Олык Ипай лӱмеш кугыжаныш премийын лауреатше:
– Телым курык гыч ватрушко дене мунчалташ, катокышто коньки дене лывыла пӧрдаш моткоч йӧратена. Ночко луман игечыште, изи йочала йывыртен, лум кугызам ыштена.
Тений ӱдыремлан У ийлан ечым пӧлекленыт, садлан чӱчкыдынак ечыгорныш лектеш. Ялыш мийыме годым лумым куашат пеш келша.
Валентина ЕФРЕМОВА, Марий Эл культурын сулло пашаеҥже:
– Мый лумым куаш йӧратем. Капка ончылно лопкан гына эрыктен шындем да чонем куана.
Уныкамын изиракше годым лум лабиринтым ыштымым сайын шарнем. Туштыжо кечыгут модына, почаҥына ыле.
Татьяна УМУРБАЕВА, мурызо:
– Тек лиеш луман теле,
а кеҥеж – шокшо.
Тек йӧратымаш лиеш ныжылге,
а кече – волгыдо.
Калыкыште тыге ойлымым шуко гана колынам.
Телым пӧрдын-модын мланде ӱмбаке велше лумым ончаш йӧратем. Тиде гана тудыжо пешак шуко возын. Ялысе илышым шарналтен, лумым куанен куышым. Яндар юж да паша – шкешотан «трудотерапий».
Михаил СКОБЕЛЕВ, «Марий Эл» увер агентствын фотографше:
– Историйым шергалаш гын, Кугыжа Николай II лумым куаш йӧратен. Мыламат изиэм годсек ты паша пеш келша, лумым шӱкаш ачам лӱмынак изи торчакым ыштен пуэн. Тений теле чот луман, садлан нойымешкат сита. Йоча годсым шарналтен, кызытат торчак дене шӱкем.
Ечыгорнышкат лекташ йӧратена. Тений пелашемлан ечым налын пуышым, ынде эргымланат пӧлеклаш шонем. Но тиде ийын эше ечым чиен омыл, лишыл жапыште лекташ шонем. Ӱмаште Йошкар-Ола воктенысе Пӱнчерыште ече дене коштынам, но чаманен каласыман, южышт пийыштым тушко луктыт. А нунышт я йоча-шамыч ӱмбаке кержалтыт, я ечыгорным амыртен кодат.
Телымсе мотор пӱртӱсыштӧ йолынат кошташ келша, вет фотографлан чылажымат эскерен, ужын шуктыман.
Жап лийме семын еш але йолташ-влак дене ий полатыш коньки дене мунчалташ коштына.
А.БАЙКОВА
Авторын фотожо
