Марий Эл правительстве вуйлатышын алмаштышыже А.А.Сальниковын эртарыме региональный штабыште Марий Элыште газ пучым шупшмо (газификаций) да улшышко ешарен пуртымо (догазификаций) йодышым каҥашеныт. Тушко «Йошкар-Ола Газпром межрегионгазын» генеральный директоржын кучем да регион-влак дене паша шотышто алмаштышыже О.А.Ляпустин ушнен.
Палемденыт, 2021–2025 ийлан Марий Эл Республикыште газым ситарыме да газификацийым вияҥдыме программыш пуртымо объект-влакым чоҥымо паша график дене келшышын шукталтеш, республик шке ӱмбакше налме обязательствым 100 процентлан шуктен кертеш.
2023 ийыште илемла кокласе газ пучым Советский ден Оршанке районлаште пашаш колтымо. Кызыт план почеш потребитель-влак деке шупшыт. Идалык мучаш марте Звенигово районысо Какшамарий, Юлъял, Уржумка да Таир марте шуйнышо газ пучым пыштен шуктат. Ялла кокласе 6 газопроводым ыштыме шотышто проект паша кая.
Тачысе кечылан догазификацийым ышташ регионышто илыше-влак деч 6,4 тӱжем утла йодмаш пурен, мланде участке марте шупшмо шотышто 5,9 тӱжем ойпидышым шуктымо. Куд тӱжем пӧртыш газым пурташ технический йӧн ышталтын. Газым ешарен пуртымо шотышто РФ регион-влакын рейтингыштышт Марий Эл – 3-шо верыште.
Республикыште посна категориян граждан-влаклан социальный полыш пуалтеш. Газ оборудованийым налаш да шындаш, тыгак догазификаций годым сурт оралте кӧргышто ыштыме пашалан 100 тӱжем теҥге марте субсидий ойыралтеш.
«Йошкар-Ола Газпром газораспределений» Оршанке, Морко, Курыкмарий, У Торъял районласе фельдшерско-акушерский пукт да образовательный школла деч налме 6 йодмаш почеш газ улшышко ешарен пуртымо пашам шуктен. Чоҥымо да монтаж пашам ыштыме, чыла объектым газым пуышо системыш ушымо.
«Газым ситарыме да газификацийым вияҥдыме программыште палемдыме мероприятий-влакым шуктымо шотышто Марий Эл ик эн сай показатель-влакым ончыкта. Догазификаций кышкарыште 4500 суртышто канде тул чӱкталтын, тидыже газ компанийын да правительствын пашам кыртмен ыштымышт нерген ойла, – каласен Олег Ляпустин.
Марий Эл Республикым вуйлатышын администрацийжын информаций пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
