Марий Элыште илыше 8132 еҥ пенсийже дене пырля эше ялозанлыкыште пашам ыштымыжлан ешартыш выплатым налеш.
Ялысе-шамыч шоҥгылык але инвалидность шотышто страховой пенсийышт пелен эше 25 процентлан кугемдыме выплатым налаш праван улыт. 2024 ий 1 январь гыч шоҥгылык шотышто страховой пенсийыш 2033 теҥгем ешарен тӱлат, III группо инвалидность шотышто пенсийыш – 1016 теҥгем. Но тыгай выплатым ялозанлыкыште 30 ий тыршыше, ялыште илыше да тӱлыман пашам ыштыдыме граждан-влаклан гына палемдат.
Ешартыш выплатым пенсий дене ик жапыште палемдат, но тудым пенсионерын пашам ыштыдымыж годым веле тӱлат. Айдеме пенсийым палемдыме жаплан пашам ышта гын, ешартыш выплатылан Социальный фондын пӧлкашкыже паша гыч лекмекыже мийышаш.
30 ияш стажыш колхозышто, совхозышто, моло ялозанлык предприятийыште агрономлан, трактористлан, ветеринарлан, мӱкшызылан да моло специалистлан (500 утла профессий) ыштыме жап гына огыл, йоча-влакым ончымо, отпускышто да больничныйыште улмо пагытат пурат.
Трудовой книжкаште ялозанлыкыште пашам ыштыме деч вара вигак специальный военный операцийыште лийме жап кая гын, тиде пагытат ешартыш выплатым налаш правам пуа.
Палемдыме выплате пенсионерын ял гыч олаш илаш куснымыж годымат аралалт кодеш.
М.ИВАНОВА
Снимкыште: Волжский районысо Руш Шайра ялыште илыше Р.Иванова ден З.Алексеева ӱмырышт мучко ялозанлыкыште тыршеныт
М.Иванован фотожо/ «Марий Эл» увер агентстве
