Марий Элым вуйлатышын пашажым жаплан шуктышо Юрий Зайцев виктарыше компаний-влакым тергаш кӱштен.
Черетан оперативный совещанийыште Ю.Зайцев кумдыкым тӱзатыме, шыже-теле пагытлан ямдылалтме, социально кӱлешан объект-шамычым чоҥымо да калыкым аварийный илыме верла гыч кусарыме республиканский адресный программын шукталтмыж дене кылдалтше йодыш-влаклан посна тӱткышым ойырен. Палемдымыж почеш, социальный сетьлашке виктарыше компаний-влакын пашашт шотышто шуко вуйшиймаш пура. Тылеч посна, шыже-теле пагытлан ончылгоч ямдылалташ кӱлеш.
Чоҥымо паша, архитектур да илыме-коммунал озанлык министр Михаил Степановын каласкалымыж почеш, республикым социально-экономически вияҥдыме индивидуальный программын кышкарыштыже илыме-коммунал озанлыкын инфраструктуржым модернизироватлат. Тений тидлан 82 миллион теҥгем кучылташ палемдыме. Тышке Волжскышто Александровский водозаборым чоҥымо пашам пуртымо. Кызыт тудо 48 процентлан ямде. Тыгак Звениговышто эрыктыме сооруженийын зданийжым чоҥат да канализацийын эрыктыме сооруженийжым уэмден олмыктат. Объект 60 процентлан ямде. Чумыр пашам 410 миллион теҥгелан аклыме. Тыгак Йошкар-Олаште Киров урем гыч Петров урем марте Ураев паркым, Волжскышто азам ыштыме отделенийлан зданийым да Республиканский ветеринар лабораторийым чоҥат. Чыла паша график почеш шукталтеш.
Таче кечылан аварийный илыме верла гыч 1380 еҥым кусарыме, тидыже идалыклан палемдыме гыч 82,6 процент лиеш, тыгодым 16 тӱжем квадрат метр аварийный илыме верым кораҥдыме. 5 июльышто Советский районышто шуко пачеран пӧртым чоҥен пытарыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
