Яков Эшпай лӱмеш Марий кугыжаныш филармонийыште Марий Эл вуйлатыше Юрий Зайцев йоча-влакым У ий дене саламлен да «Кумылым шуктышо кож» акцийыш ушнышо икшыве-влаклан пӧлекым кучыктен.
– У ий деч ончыч Кремльыште кож гыч президент Владимир Владимирович Путинлан йодмашдам возыман шарым налынам. Шонымашда шукталтмылан моткоч куанем. Тек у 2026 ий куштылго да пиалан лиеш, – ойлен ӱдыр-рвезе-влаклан регион вуйлатыше.
Пӧлекым Морко посёлкысо школышто тунемше 11 ияш Игнат Михайлов налын. Тудо велосипедан лияш шонен. Пӧлек деч посна 10 ияш Вера шӱжарже ден 3 ияш Артем шольыжат кодын огытыл. Нунын ачашт кызыт специальный военный операций кайыме кундемыште.
Йошкар-Ола гыч 9 ияш Тимур Иванов У ий пайрем лӱмеш ударный установкым йодын. Тазалык шотышто ойыртемалтше улмыжлан кӧра тудо мӧҥгыштыжӧ тунемеш. Рвезын 7 ияш Кира шӱжаржымат пӧлек дене куандареныт – курчакым кучыктеныт. Тыгак нунылан лачка пӧлекым пуэныт.
Шукертсек вучымо пӧлеклан Тимур Юрий Зайцевлан тауштен да ударный установко дене модын моштымыжым ончыктен.
Мероприятий пытымеке, йоча-влаклан Марий кугыжаныш филармоний мучко экскурсийым эртареныт.
Марий Эл вуйлатышын пресс-службыжын уверже негызеш Любовь Камалетдинова ямдылен.
