1 апрель – Воштылчык кече. Мыскарам илышыште шукын кучылтыт. Тудо кумылым нӧлта, илышнам оҥайракым да веселаракым ышта веле огыл, эсогыл тудым шкешотан эмлан шотлат. Арам огыл калыкыште тыге ойлат: «Воштылат – ӱмырет кок пачаш кужурак лиеш».
Марий артист, мурызо да палыме еҥ-влак мыскарам йӧратат мо? 1 апрельыште нуным иктаж-кӧ ондален але шкешт ондалалтыныт?
Светлана Строганова, Марий Элын калык артистше:
– Мыскарам моткоч йӧратем! Йоча годым тушко ончал але тувырышкет шӱртӧ пижын манын ондаленыт, а кызытрак – уке, тидлан мый шке специалист улам! Мыскара кечын шуко еҥым ондаленам, очыни, лудмышт годым воштылалын, мыйым шарналтат. Кӧ мыскарам ышташ тунемнеже гын, туныктенат кертам!
Володя Матвеев, мурызо, Марий Эл Радион тӱҥ редакторжо:
– Мыскара шӱлыш – эре пеленем. Утларакше тудым возаш йӧратем. Мыскарам сценарийышкат пуртедылам, тӱрлӧ сценкым ямдылыме годымат кучылтам.
А.БАЙКОВА ямдылен
